દક્ષિણ ભારતના ચેન્નાઈમાંથી એક ચોંકાવનારો કિસ્સો સામે આવ્યો છે. અહીં એક પતિએ તેની પત્ની પર એસિડ એટેક કર્યો છે. આ સમગ્ર ઘટના નજીકમાં લાગેલા CCTV કેમેરામાં કેદ થઈ ગઈ છે. હુમલામાં મહિલાએ તેની એક આંખની 50% રોશની ગુમાવી દીધી છે.
લગ્ન માટે ખ્રિસ્તીમાંથી મુસ્લિમ બની હતી મહિલા
29 વર્ષની પીડિત મહિલાએ જણાવ્યું કે તેણે પોતાના પરિવારની મરજી વિરુદ્ધ જઈને મહોમ્મદ અલી સાથે લગ્ન કર્યા હતા. લગ્ન માટે તેણે પોતાનો ધર્મ પણ બદલ્યો હતો. તે પહેલા ખ્રિસ્તી હતી, પરંતુ લગ્ન કરવા માટે તેણે ઇસ્લામ ધર્મ અપનાવ્યો હતો.
અત્યાચાર અને છૂટાછેડાની અરજી
મહિલાના જણાવ્યા મુજબ, છેલ્લા 6 વર્ષથી તે પતિના અત્યાચાર સહન કરી રહી હતી.
-
પતિ વારંવાર શક કરતો અને તેની સાથે મારપીટ કરતો હતો.
-
કંટાળીને મહિલાએ છૂટાછેડા (Divorce) માટે અરજી કરી હતી અને અલગ રહેતી હતી.
-
અત્યાચારથી કંટાળીને તેણે બે વાર આત્મહત્યાનો પ્રયાસ પણ કર્યો હતો.
CCTVમાં કેદ થયો હુમલો
રવિવારે રાત્રે આરોપી મહોમ્મદ અલી વાત કરવાના બહાને પત્નીના ઘરે પહોંચ્યો હતો. બંને વચ્ચે ઉગ્ર બોલાચાલી થઈ અને અચાનક મહોમ્મદ અલીએ એસિડની બોટલ કાઢી. મહિલાએ ભાગવાનો પ્રયાસ કર્યો, પરંતુ પતિએ પીછો કરીને તેના ચહેરા પર એસિડ ફેંકી દીધું.
“મેં મારા પરિવારને છોડીને તેની સાથે લગ્ન કર્યા હતા, બદલામાં મને માત્ર અત્યાચાર અને આ દર્દ મળ્યું છે.” — પીડિત મહિલાનું નિવેદન
પડોશીએ બચાવ્યો જીવ
જ્યારે હુમલો થઈ રહ્યો હતો, ત્યારે એક જાગૃત પડોશીએ વચ્ચે આવીને આરોપીને રોક્યો હતો. જેના કારણે મહિલાને ત્યાંથી ભાગવાની તક મળી હતી. હાલ મહિલા પૂનામલ્લીની હોસ્પિટલમાં સારવાર હેઠળ છે. પોલીસે આ મામલે ગુનો નોંધી વધુ તપાસ હાથ ધરી છે.
