ક્યાં સુધી યુદ્ધનો ભોગ બનશે ભારતીયો? યુક્રેનમાં વધુ એક જહાજ પર હુમલા બાદ બે ક્રૂ મેમ્બર ગુમ

યુક્રેનમાં ચાલી રહેલા સંઘર્ષ વચ્ચે વધુ એક ચિંતાજનક સમાચાર સામે આવ્યા છે. યુક્રેનના ઓડેસા બંદર પર 26 જુલાઈએ એક ભારતીય વેપારી જહાજ પર હુમલો થયો છે.

હુમલાનો ભોગ બનેલા જહાજનું નામ ‘MV AGN Ragnar’ છે. આ જહાજ પર 4 ભારતીય નાગરિકો સવાર હતા.

2 ભારતીયો સુરક્ષિત, 2 સભ્યોની શોધખોળ ચાલુ

કીવ સ્થિત ભારતીય દૂતાવાસે આ ઘટના અંગે સત્તાવાર નિવેદન આપ્યું છે.

• જહાજ પર રહેલા 4 ભારતીયોમાંથી 2 ક્રૂ મેમ્બર્સ સંપૂર્ણપણે સુરક્ષિત છે.

• બાકીના 2 ભારતીય સભ્યો વિશે હજુ સુધી કોઈ માહિતી મળી નથી.

• ભારતીય દૂતાવાસ સ્થાનિક સત્તાવાળાઓ અને એજન્સીઓના સંપર્કમાં છે.

• અધિકારીઓ પરિસ્થિતિ પર સતત નજર રાખી રહ્યા છે.

ઓડેસા બંદરનું વ્યૂહાત્મક મહત્વ

ઓડેસા એ યુક્રેનના મહત્વપૂર્ણ કાળા સમુદ્ર (Black Sea)ના બંદરોમાંથી એક છે. 2022માં રશિયા અને યુક્રેન વચ્ચે સંઘર્ષ શરૂ થયો હતો. ત્યારથી આ બંદર પર અનેક વખત હવાઈ અને મિસાઈલ હુમલા થઈ ચૂક્યા છે.

તાજેતરમાં જ 4 ભારતીય નાવિકોના મોત થયા હતા

આ ઘટના પહેલા પણ યુક્રેન કિનારે એક કાર્ગો જહાજ પર હુમલો થયો હતો.

• તે હુમલામાં 4 ભારતીય નાવિકોએ જીવ ગુમાવ્યો હતો.

• એક ભારતીય નાવિક ગંભીર રીતે ઘાયલ થયો હતો.

તે ઘટના બાદ ભારતે રશિયાના ચાર્જ ડી અફેર્સને સમન્સ પાઠવ્યા હતા. ભારતીય વિદેશ મંત્રાલયે આ હુમલા સામે સખત વિરોધ નોંધાવ્યો હતો. ભારતે સ્પષ્ટ કહ્યું હતું કે વેપારી જહાજો પર હુમલા અને ભારતીયોના મોત સંપૂર્ણપણે અસ્વીકાર્ય છે.