પતિની લાશ પાસે બેસીને ફોન સ્ક્રોલ કરતી રહી લેડી ડોક્ટર, હૃદયકંપાવનારી ઘટના

Dharwad Doctor Murder Case: કર્ણાટકના ધારવાડ (Dharwad) માંથી સંબંધોને શર્મસાર કરતી અને હૃદય ધ્રુજાવી દે તેવી એક ઘટના સામે આવી છે. અહીં એક પોશ એપાર્ટમેન્ટમાં ૪૫ વર્ષીય એનેસ્થેટિસ્ટ (Anesthesiologist) ડૉ. કિરણ હોનન્નાવરની લાશ લોહીલુહાણ હાલતમાં મળી આવી હતી. તેમના શરીર પર ગળા અને અન્ય ભાગોએ ચપ્પુના ૮થી ૧૦ ઊંડા ઘા હતા.

પુત્ર લોહીના ખાબોચિયામાં તડપતો રહ્યો, પિતાનો જીવ ગયો

આ ઘટનાનો સૌથી ચોંકાવનારો અને ક્રૂર ચહેરો ત્યારે સામે આવ્યો જ્યારે પોલીસ બુધવારે સાંજે ફ્લેટમાં દાખલ થઈ. ડૉ. કિરણનો મૃતદેહ એક રૂમમાં પડ્યો હતો. જ્યારે બીજા રૂમમાં તેમનો ૮ વર્ષનો દિવ્યાંગ પુત્ર નિહિત લોહીથી લથપથ હાલતમાં પડ્યો હતો. માસૂમ બાળકની છાતી પર પણ ચપ્પુના ૩થી ૪ ઘા ઝીંકવામાં આવ્યા હતા.

જ્યારે આ બધું થઈ રહ્યું હતું, ત્યારે આરોપી ડૉ. પ્રિયાંકા બેડ પર બેસીને ખૂબ જ આરામથી પોતાના મોબાઈલ ફોનમાં સોશિયલ મીડિયા સ્ક્રોલ કરી રહી હતી. તેને આસપાસની કોઈ ઘટનાની ચિંતા જ નહોતી. પોલીસે જ્યારે જોયું કે બાળકના શ્વાસ હજુ ચાલી રહ્યા છે, ત્યારે તેને તાત્કાલિક હોસ્પિટલ ખસેડવામાં આવ્યો હતો.

પત્નીએ ૨૪ કલાક સુધી બનાવટી વાર્તાઓ કહી

પોલીસ તપાસમાં બહાર આવ્યું છે કે ડૉ. કિરણની હત્યા કદાચ મંગળવારે રાત્રે જ કરી દેવામાં આવી હતી.

• મંગળવાર રાતથી જ જ્યારે પણ કિરણના સંબંધીઓ કે હોસ્પિટલના સ્ટાફે તેમના ફોન પર કોલ કર્યો, ત્યારે પ્રિયાંકાએ જ ફોન ઉપાડ્યો હતો.

• તેણીએ દરેકને અલગ-અલગ બહાના બતાવ્યા કે કિરણ કાં તો ઊંઘી રહ્યા છે, થાકી ગયા છે અથવા હોસ્પિટલ ડ્યુટી પર ગયા છે.

• જ્યારે બુધવારે સાંજ સુધી કિરણનો કોઈ સંપર્ક ન થયો, ત્યારે શંકા જતા સંબંધીઓ ફ્લેટ પર પહોંચ્યા અને આ સમગ્ર ભયાનક કાંડ બહાર આવ્યો.

ત્રણ દિવસ પહેલા જ ચપ્પુ બતાવીને આપી હતી ધમકી

પોલીસ કમિશનર એન. શશિકુમારના જણાવ્યા અનુસાર, ફ્લેટમાં બહારથી કોઈના પણ બળપૂર્વક પ્રવેશવાના પુરાવા મળ્યા નથી. સીસીટીવી ફૂટેજ પણ સ્પષ્ટ કરે છે કે ઘરમાં માત્ર પતિ, પત્ની અને બાળક જ હતા.

કિરણના પરિવારજનોએ આક્ષેપ કર્યો છે કે બંને વચ્ચે અવારનવાર ઘરેલું ઝઘડા થતા હતા. ત્રણ દિવસ પહેલા જ પ્રિયાંકાએ કિરણને ચપ્પુ બતાવીને જાનથી મારી નાખવાની ધમકી પણ આપી હતી. ડૉ. કિરણ જ્યારે ઊંઘતા હતા ત્યારે જ તેમના પર આયોજનબદ્ધ રીતે હુમલો કરવામાં આવ્યો હતો.

હાલમાં પોલીસે આરોપી મહિલા ડૉક્ટર પ્રિયાંકાને કસ્ટડીમાં લઈ લીધી છે અને આ ભયાનક હત્યાકાંડ પાછળનું અસલી કારણ જાણવા વધુ તપાસ હાથ ધરી છે.