જો તમને છેલ્લા થોડા દિવસોથી બજારમાં ટામેટા, ડુંગળી અને બટાકા મોંઘા લાગી રહ્યા છે, તો આ તમારો ભ્રમ નથી. દેશભરમાં આ ત્રણેય મુખ્ય શાકભાજીના ભાવ સતત વધી રહ્યા છે. આનાથી સામાન્ય માણસના રસોડાનું બજેટ ફરી એકવાર ખોરવાઈ ગયું છે. ગ્રાહક બાબતોના મંત્રાલયના જણાવ્યા મુજબ, છેલ્લા એક મહિનામાં ટામેટાની સરેરાશ છૂટક કિંમતમાં લગભગ 18 ટકાનો વધારો થયો છે.
શાકભાજી કેમ મોંઘી થઈ રહી છે?
-
ભીષણ ગરમી: અતિશય તાપમાનના કારણે પાકને મોટું નુકસાન થયું છે.
-
નબળો પુરવઠો: માર્કેટમાં શાકભાજીની આવક ઓછી થઈ ગઈ છે.
-
ચોમાસાની અનિશ્ચિતતા: વરસાદ મોડો પડવાને કારણે ચિંતા વધી છે.
ટામેટા ના ભાવમાં 50% સુધીનો ઉછાળો
એક રિપોર્ટ અનુસાર, સૌથી વધુ અસર ટામેટા ના ભાવ પર પડી છે. ઉત્તર પ્રદેશ, બિહાર અને મધ્ય પ્રદેશ જેવા રાજ્યોમાં ટામેટાના ભાવ 50 ટકા સુધી વધી ગયા છે. દેશની રાજધાની દિલ્હીમાં તો ટામેટાના ભાવ લગભગ બમણા થઈ ગયા છે. ગરમીના કારણે ટામેટા રસ્તામાં જ બગડી જાય છે, જેથી તેની હેરફેર મુશ્કેલ બની છે.
ડુંગળી અને બટાકા પણ થયા મોંઘા
આંકડા શું કહે છે?: છેલ્લા એક મહિનામાં ડુંગળીના ભાવમાં 11 ટકા અને બટાકાના ભાવમાં 1.3 ટકાનો વધારો નોંધાયો છે.
નિષ્ણાતોના મતે, કવખતના વરસાદને કારણે ડુંગળીની ગુણવત્તા બગડી ગઈ છે. આ જ કારણે બજારમાં સારી ગુણવત્તાવાળી ડુંગળી ઓછી આવી રહી છે. ગત વર્ષની સરખામણીએ ટામેટા 25 ટકા અને ડુંગળી 3.3 ટકા મોંઘી થઈ ચૂકી છે.
શું હજુ પણ ભાવ વધશે?
ચોમાસા દરમિયાન શાકભાજીના ભાવમાં વધઘટ થવી સામાન્ય બાબત છે. પરંતુ આ વખતે અલ-નીનોની અસર અને ભીષણ ગરમીએ સ્થિતિ વધુ બગાડી છે. જો આગામી દિવસોમાં વરસાદ સામાન્ય નહીં રહે, તો શાકભાજીના ભાવ હજુ પણ વધી શકે છે. આનાથી મધ્યમ અને ગરીબ પરિવારો પર મોંઘવારીનો બોજ વધુ વધશે.
