જોબ છૂટતાં જ રાતોરાત અમેરિકા છોડવું પડશે! ટ્રમ્પના નવા પ્રસ્તાવથી ભારતીય પરિવારોમાં ફફડાટ

H1B VISA  : અમેરિકામાં ડોનાલ્ડ ટ્રમ્પ પ્રશાસને વિદેશી કુશળ કર્મચારીઓ માટેના નિયમો વધુ કડક બનાવવાની દિશામાં મોટું પગલું ભર્યું છે. H-1B સહિતના વર્ક વિઝા ધરાવતા પ્રોફેશનલ્સ માટે નોકરી છૂટી ગયા બાદ મળતી 60 દિવસની રાહત મુદત (Grace Period) નાબૂદ કરવાના પ્રસ્તાવની વ્હાઇટ હાઉસે સમીક્ષા પૂર્ણ કરી લીધી છે. હોમલેન્ડ સિક્યોરિટી વિભાગ (DHS) દ્વારા રજૂ કરાયેલા આ પ્રસ્તાવને સુધારા સાથે મંજૂરી મળતાં જ અમેરિકામાં વસતા લાખો ભારતીય IT કર્મચારીઓ અને તેમના પરિવારોમાં ભારે ચિંતા પ્રસરી ગઈ છે.

જો આ પ્રસ્તાવ આખરી નિયમ તરીકે અમલમાં આવશે, તો નોકરી ગુમાવતાં જ ભારતીય પ્રોફેશનલ્સે તુરંત અમેરિકા છોડવું પડી શકે છે.

મુખ્ય મુદ્દા (Highlights):

• H-1B, L-1 અને O-1 વિઝાધારકો માટે 60 દિવસનો વર્તમાન ગ્રેસ પિરિયડ નાબૂદ કરવાનો પ્રસ્તાવ.

• વ્હાઇટ હાઉસના ઓફિસ ઓફ ઇન્ફોર્મેશન એન્ડ રેગ્યુલેટરી અફેર્સે 27 ઑગસ્ટે સુધારા સાથે મંજૂરી આપી.

• સૌથી મોટો ફટકો ભારતીયોને પડશે, કારણ કે H-1B વિઝા મેળવનારાઓમાં 70% થી વધુ ભારતીય IT વર્કર્સ છે.

• રાષ્ટ્રપ્રમુખના પૂર્વ સલાહકાર અજય જૈન ભુટોરિયાએ આ પગલાંને ‘અમાનવીય અને ગંભીર’ ગણાવ્યું.

વિઝા નિયમમાં ફેરફાર: વર્તમાન સ્થિતિ વિરુદ્ધ નવો પ્રસ્તાવ

નિર્ણય સામે કેમ ઉઠ્યો ભારે વિરોધ?

અમેરિકાના રાષ્ટ્રપ્રમુખના ભૂતપૂર્વ સલાહકાર અજય જૈન ભુટોરિયાએ આ પગલાંની આકરી ટીકા કરતાં જણાવ્યું કે ટેકનોલોજી, હેલ્થકેર અને એન્જિનિયરિંગ ક્ષેત્રે નવી નોકરી મેળવવી અને વિઝા ટ્રાન્સફરની જટિલ કાગળની કામગીરી પૂર્ણ કરવામાં મહિનાઓ વીતી જાય છે. જ્યાં અગાઉ આ મુદત વધારીને 180 દિવસ કરવાની માંગણી ચાલી રહી હતી, ત્યાં આ સમયગાળો સાવ ખતમ કરી દેવો એ પ્રતિભાશાળી પ્રોફેશનલ્સ સાથે અન્યાય સમાન છે.

હવે પછીની પ્રક્રિયા શું રહેશે?

યુએસ સિટિઝનશિપ એન્ડ ઇમિગ્રેશન સર્વિસીસ (USCIS) દ્વારા નિયમ નંબર 1615-AD 22 હેઠળ ડ્રાફ્ટ તૈયાર કરાઈ રહ્યો છે. આ પ્રસ્તાવ ટૂંક સમયમાં ‘ફેડરલ રજિસ્ટર’માં જાહેર જનતા અને ઉદ્યોગ જગતના વાંધા-સૂચનો મેળવવા માટે મૂકવામાં આવશે. જ્યાં સુધી સમગ્ર કાયદાકીય પ્રક્રિયા પૂર્ણ થઈને આખરી નોટિફિકેશન બહાર ન પડે ત્યાં સુધી હાલની 60 દિવસની છૂટછાટની વ્યવસ્થા અમલમાં રહેશે.