મધ્ય પ્રદેશના રાજગઢ જિલ્લામાંથી સરકારી નોકરીમાં છેતરપિંડીનો એક ચોંકાવનારો કિસ્સો સામે આવ્યો છે. અહીં બીજાની માર્કશીટ પર પોતાનું નામ લખીને શિક્ષકની સરકારી નોકરી મેળવનારા ૮ શિક્ષકો સામે પોલીસે મોટી કાર્યવાહી કરી છે. આ તમામ આરોપીઓ છેલ્લા ૧૯ વર્ષથી નકલી દસ્તાવેજોના આધારે સરકારી નોકરી કરી રહ્યા હતા.
જિલ્લા શિક્ષણ વિભાગ દ્વારા આ તમામ શિક્ષકોને બરતરફ કરવામાં આવ્યા છે. ત્યારબાદ મંગળવારે બ્યાવરા સિટી પોલીસ સ્ટેશનમાં તમામ વિરૂદ્ધ ગુનો (FIR) દાખલ કરાયો છે. પોલીસે હાલમાં ૭ નકલી શિક્ષકોની ધરપકડ કરીને તેમને કોર્ટમાં રજૂ કર્યા છે. કોર્ટે તમામ આરોપીઓને એક દિવસના પોલીસ રિમાન્ડ પર મોકલી આપ્યા છે.
કેવી રીતે ખૂલ્યું કૌભાંડ?
બ્યાવરા સિટી પોલીસ સ્ટેશનના પ્રભારી શિવરાજ સિંહ ચૌહાણે જણાવ્યું કે, આ તમામ શિક્ષકોએ ડી.એડ (D.Ed) ની નકલી માર્કશીટ લગાવીને સરકારી નોકરી મેળવી હતી.
-
આ મામલે શાસન સ્તર પર એક ખાસ તપાસ ટીમ (SIT) ની રચના કરવામાં આવી હતી.
-
તપાસ દરમિયાન જાણવા મળ્યું કે, આ માર્કશીટ કર્ણાટક સ્ટેટ ઓપન યુનિવર્સિટી, મૈસૂરના નામે બનાવવામાં આવી હતી જે સંપૂર્ણપણે નકલી હતી.
આ શિક્ષકો સામે નોંધાઈ FIR
પોલીસના જણાવ્યા અનુસાર પવન શર્મા, સુનીલ પ્રજાપતિ, હેમંત શર્મા, સાવિત્રી ડાંગી, બને સિંહ લવવંશી, ભારત સિંહ યાદવ, હરિપ્રસાદ લવવંશી અને હિંમત સિંહ મીણા સામે ખોટા દસ્તાવેજો તૈયાર કરવા બદલ ગુનો નોંધવામાં આવ્યો છે.
આ તમામ સામે છેતરપિંડી, કાવતરું ઘડવું અને નકલી દસ્તાવેજોનો અસલી તરીકે ઉપયોગ કરવા બદલ અલગ-અલગ કડક કલમો હેઠળ ગુનો દાખલ કરાયો છે. આ કેસમાં સામેલ અન્ય એક શિક્ષક રમેશ ચંદ્ર હાલમાં ફરાર છે, જેની પોલીસ સઘન શોધખોળ કરી રહી છે.
૧૯ વર્ષ સુધી સરકારને છેતરતા રહ્યા
નકલી માર્કશીટનો ખુલાસો થયા બાદ શિક્ષણ વિભાગ પણ ચોંકી ઉઠ્યો છે. આ શિક્ષકો લગભગ બે દાયકાથી સરકારી તિજોરીમાંથી પગાર મેળવી રહ્યા હતા. હવે પોલીસ રિમાન્ડ દરમિયાન આરોપીઓ પાસેથી વધુ ખુલાસા થવાની સંભાવના છે. રાજ્યમાં અન્ય કોઈ શિક્ષકો પણ આવી નકલી માર્કશીટના આધારે નોકરી મેળવીને તો નથી બેઠા ને, તે એન્ગલથી પણ તપાસ તેજ કરવામાં આવી છે.
