ગુજરાતમાં સ્થાનિક સ્વરાજ્યની ચૂંટણીઓ પહેલા જ રાજકીય ગરમાવો ચરમસીમા પર પહોંચ્યો છે. વડોદરા જિલ્લાની ડભોઈ તાલુકા પંચાયત કચેરી ખાતે આજે ભારે અફરાતફરીનો માહોલ સર્જાયો હતો, જ્યાં ભાજપના ધારાસભ્ય અને કોંગ્રેસ ના કાર્યકરો સામસામે આવી ગયા હતા.
શું હતી સમગ્ર ઘટના?
મળતી માહિતી મુજબ, ડભોઈ તાલુકા પંચાયતની સાઠોદ બેઠક પરથી કોંગ્રેસ ના ઉમેદવાર અરવિંદભાઈ પાટણવાડિયાએ ફોર્મ ભર્યું હતું. આક્ષેપ છે કે, ડભોઈના ભાજપના ધારાસભ્ય શૈલેષ મહેતા (સોટા) અને તેમનો પુત્ર, કોંગ્રેસ ના ઉમેદવાર પર દબાણ લાવીને અથવા ધાક-ધમકી આપીને તેમનું ઉમેદવારી પત્ર જબરજસ્તીથી પરત ખેંચાવવાનો પ્રયાસ કરી રહ્યા હતા.
તાલુકા પંચાયત કચેરીમાં ઝપાઝપી
આ ઘટનાની જાણ થતા જ ડભોઈ તાલુકા કોંગ્રેસ પ્રમુખ સહિત સાઠોદ ગામના મોટી સંખ્યામાં ગ્રામજનો અને કાર્યકરો તાલુકા પંચાયત કચેરીએ ધસી આવ્યા હતા. ભાજપની આ કથિત ‘દાદાગીરી’ સામે કોંગ્રેસના કાર્યકરોએ ઉગ્ર સૂત્રોચ્ચાર કર્યા હતા.
મામલો એટલો બિચક્યો કે ઉશ્કેરાયેલા ટોળાએ ધારાસભ્ય શૈલેષ સોટા અને તેમના પુત્રને ધક્કે ચઢાવ્યા હતા. કચેરીમાં આશરે 15-20 મિનિટ સુધી ભારે ધમાલ અને ઝપાઝપી ચાલી હતી. પરિસ્થિતિ ગંભીર બનતા ડભોઈ પોલીસનો કાફલો તાત્કાલિક સ્થળ પર પહોંચ્યો હતો અને મામલો થાળે પાડ્યો હતો.
લોકશાહીનું હનન: કોંગ્રેસનો આક્ષેપ
કોંગ્રેસે આક્ષેપ કર્યો છે કે, સત્તાધારી પક્ષ ભાજપ પોતાના ઉમેદવારોને બિનહરીફ બનાવવા માટે લોકશાહીનું હનન કરી રહ્યો છે. વિપક્ષના ઉમેદવારોને ડરાવી-ધમકાવીને ચૂંટણી મેદાનમાંથી હટાવવાના પ્રયાસો થઈ રહ્યા છે. હાલ પોલીસે આ મામલે બંને પક્ષો સામે કાયદેસરની કાર્યવાહી હાથ ધરી છે. કોંગ્રેસે આક્ષેપ કર્યો છે કે સત્તાધારી પક્ષ ભાજપ પોતાના ઉમેદવારોને બિનહરીફ બનાવવા માટે લોકશાહીનું હનન કરી રહ્યો છે અને વિપક્ષના ઉમેદવારોને ડરાવી-ધમકાવીને ચૂંટણી મેદાનમાંથી હટાવવા માંગે છે. પોલીસે હાલ બંને પક્ષો સામે કાયદેસરની કાર્યવાહી કરવાની પ્રક્રિયા હાથ ધરી છે.
