નેપાળ ની સત્તાધારી પાર્ટી ‘રાષ્ટ્રીય સ્વતંત્ર પાર્ટી’ (RSP) ના અધ્યક્ષ રબી લામિછાનેએ મંગળવારે નવી દિલ્હીમાં ભારતીય જનતા પાર્ટી (BJP) ના રાષ્ટ્રીય અધ્યક્ષ નીતિન નવીન સાથે મુલાકાત કરી હતી. ભાજપ મુખ્યાલયમાં યોજાયેલી આ બેઠકમાં નેપાળ ના પ્રતિનિધિમંડળનું ભવ્ય સ્વાગત કરવામાં આવ્યું હતું. આ પ્રવાસ ભાજપ અધ્યક્ષ નીતિન નવીનના આમંત્રણ પર થઈ રહ્યો છે.
ભારત-નેપાળ ના ઐતિહાસિક સંબંધો પર ભાર
બેઠક દરમિયાન ભાજપના વિદેશ વિભાગના પ્રભારી વિજય ચૌથાઈવાલેએ જણાવ્યું કે, નીતિન નવીને ભારત અને નેપાળ વચ્ચેના જૂના અને મજબૂત સંબંધો પર પ્રકાશ પાડ્યો હતો. તેમણે કહ્યું કે બંને દેશો વચ્ચેનો સંબંધ સમાન સંસ્કૃતિ અને લોકો વચ્ચેના મજબૂત જોડાણ પર આધારિત છે. આવા સંવાદથી બંને પક્ષો વચ્ચે સંગઠનાત્મક સહયોગ વધુ મજબૂત બનશે.
ભાજપની વિચારધારા અને મોડલ સમજાવ્યું
ચર્ચા દરમિયાન નીતિન નવીને નેપાળ ના નેતાઓને ભાજપના સંગઠન માળખા અને વિચારધારા વિશે વિગતવાર માહિતી આપી હતી. તેમણે જણાવ્યું કે, ભાજપનું મોડલ રાષ્ટ્રીય સ્તરથી લઈને બૂથ સ્તર સુધી ફેલાયેલું છે. આ માળખામાં પાયાના કાર્યકરોની ભૂમિકા સૌથી મહત્વની છે. ભાજપની રાજનીતિનો મુખ્ય આધાર જનતા સાથે સીધો અને સતત સંપર્ક રાખવાનો છે.
નેપાળની પાર્ટીએ ભાજપ પાસેથી શું જાણ્યું?
RSP પ્રતિનિધિમંડળે ભાજપની કામગીરીમાં ઊંડો રસ દાખવ્યો હતો. તેમણે નીચેની બાબતો વિશે વિગતવાર માહિતી મેળવી હતી:
-
ભાજપની સભ્યપદ અભિયાન પ્રક્રિયા (Membership Process)
-
ચૂંટણીમાં ઉમેદવારની પસંદગીની સિસ્ટમ (Candidate Selection)
-
ગ્રાઉન્ડ લેવલના કાર્યકરો સાથે જોડાવાની વ્યવસ્થા
તેના જવાબમાં ભાજપ અધ્યક્ષે જણાવ્યું કે, વડાપ્રધાન નરેન્દ્ર મોદીના નેતૃત્વમાં પાર્ટીનો મુખ્ય ફોકસ વિકાસ, સેવા, સુશાસન અને જનકલ્યાણ પર રહ્યો છે.
Gen Z (યુવા પેઢી) ની ભૂમિકા પર વાતચીત
આ બેઠકમાં રાજકારણમાં નવી પેઢી, ખાસ કરીને ‘જેન-ઝી’ (Gen Z) ની ભૂમિકા અને સંભાવનાઓ પર પણ ચર્ચા કરવામાં આવી હતી. બંને નેતાઓએ સ્વીકાર્યું કે યુવાનો લોકશાહીમાં ભાગીદારી અને ભવિષ્યના નેતૃત્વને આકાર આપવામાં મોટી ભૂમિકા ભજવી શકે છે. ભાજપે સોશિયલ મીડિયા પ્લેટફોર્મ X પર આ મુલાકાતનો વીડિયો પણ શેર કર્યો છે.
< /p>
