ઈરાનના સર્વોચ્ચ નેતા, આયાતુલ્લાહ મોજતબા ખામેનીએ, પશ્ચિમ એશિયામાં તેના લશ્કરી થાણાઓને “કાગળના વાઘ” ગણાવીને યુનાઇટેડ સ્ટેટ્સ પર આકરા પ્રહારો કર્યા. તેમણે કહ્યું કે જો આ થાણાઓ પોતાનું રક્ષણ પણ કરી શકતા નથી, તો તેઓ આ પ્રદેશનું રક્ષણ કેવી રીતે કરશે. સોશિયલ મીડિયા પ્લેટફોર્મ X પર પોસ્ટ કરતા, ખામેનીએ અમેરિકાના સાથીઓ પર પણ નિશાન સાધ્યું. તેમણે કહ્યું, “અમેરિકાના કાગળના વાઘ જેવા થાણાઓ પોતાનું રક્ષણ પણ કરી શકતા નથી, આ ક્ષેત્રમાં અમેરિકાના સમર્થકોની તો વાત જ છોડી દો.” મોજતબાનું નિવેદન એવા સમયે આવ્યું છે જ્યારે ઈરાન, યુનાઇટેડ સ્ટેટ્સ અને ઇઝરાયલ વચ્ચે તણાવ સતત વધી રહ્યો છે અને તેમને ઘટાડવા માટે રાજદ્વારી પ્રયાસો ચાલી રહ્યા છે.
‘પોતાની રક્ષા નથી કરી શકતા, અન્યની શું કરશે?’
સોશિયલ મીડિયા પ્લેટફોર્મ X પર પોસ્ટ કરતા ખામેનેઈએ લખ્યું કે, અમેરિકાના સૈન્ય મથકો માત્ર દેખાવના જ છે. જે દેશો અમેરિકાના ભરોસે બેઠા છે તેમને નિશાને લેતા તેમણે કહ્યું કે, “જ્યારે અમેરિકી મથકો પોતાની સુરક્ષા નથી કરી શકતા, ત્યારે તે આ વિસ્તારના સમર્થકોની સુરક્ષા કેવી રીતે કરશે?”
પર્શિયન ગલ્ફ અને હોર્મુઝની સુરક્ષા
ખામેનેઈએ પર્શિયન ગલ્ફ (ફારસની ખાડી) ને ઈરાની ઓળખ અને સભ્યતાનો હિસ્સો ગણાવતા મહત્વના નિવેદનો આપ્યા:
-
અમેરિકા મુક્ત ભવિષ્ય: તેમણે દાવો કર્યો કે આવનારા સમયમાં પર્શિયન ગલ્ફ અમેરિકાની હાજરીથી મુક્ત હશે.
-
સ્ટ્રેટ ઓફ હોર્મુઝ: આ મહત્વના દરિયાઈ માર્ગની સુરક્ષા ઈરાન સુનિશ્ચિત કરશે અને કોઈપણ દુશ્મન ગતિવિધિનો જડબાતોડ જવાબ આપશે.
-
વિદેશી દખલ: તેમણે સ્પષ્ટ કર્યું કે આ વિસ્તારના દેશોનું ભાગ્ય એકબીજા સાથે જોડાયેલું છે અને બહારના દેશોએ અહીં દખલ ન કરવી જોઈએ.
તણાવ ઘટાડવાનો પ્રસ્તાવ પણ મોકલ્યો
એક તરફ આકરા નિવેદનો વચ્ચે ઈરાને અમેરિકા સાથેનો તણાવ ઘટાડવા માટે પાકિસ્તાન મારફતે એક નવો પ્રસ્તાવ પણ મોકલ્યો છે. જોકે, અમેરિકી રાષ્ટ્રપતિ ડોનાલ્ડ ટ્રમ્પ આ પ્રસ્તાવને ફગાવી દે તેવા સંકેતો મળી રહ્યા છે. પશ્ચિમી દેશોની સૈન્ય હાજરીને ખામેનેઈએ આ વિસ્તારમાં અસ્થિરતાનું મુખ્ય કારણ ગણાવ્યું છે.
