જોજો, તમે ના છેતરાતા! શેરબજારમાં રોકાણના નામે ગાંધીનગરના વેપારી સાથે લાખોની છેતરપિંડી, જુઓ કેવી રીતે રૂપિયા પડાવ્યા:

Stock Market Investment Fraud Gandhinagar: રાજ્યના પાટનગર ગાંધીનગરમાં સાયબર ગઠિયાઓએ રોકાણના નામે વધુ એક વેપારીને લાખોનો ચૂનો લગાવ્યો છે. ગાંધીનગરના કુડાસણમાં રહેતા અને માણસામાં સબમર્સિબલ મોટર પાર્ટ્સનો વ્યવસાય કરતા 50 વર્ષીય વેપારીને ‘UTI એસેટ મેનેજમેન્ટ’ના પ્રતિનિધિ તરીકે ઓળખ આપી સાયબર માફિયાઓએ રૂ.13.79 લાખ પડાવી લીધા છે. ગાંધીનગર રેન્જ સાયબર ક્રાઈમ પોલીસે આ મામલે ગુનો નોંધી તપાસના ચક્રો ગતિમાન કર્યા છે.

13.79 લાખ ટ્રાન્સફર કરાવ્યા :
16 જૂન થી 22 જુલાઈ દરમિયાન, વેપારીને વિશ્વાસમાં લઈ અલગ-અલગ બેંક ખાતાઓમાં કુલ રૂ. 13.79 લાખ ભરાવવામાં આવ્યા હતા. આ નાણાં સાહિલ એન્ટરપ્રાઈઝ, આર એસ એન્ટરપ્રાઈઝ અને યશ ટ્રેડર્સ જેવા નામે ખોલાયેલા વિવિધ બેંક ખાતાઓમાં ટ્રાન્સફર થયા હતા. શરૂઆતમાં વિશ્વાસ જીતવા માટે આરોપીઓએ શૈલેષભાઈને 1000 રૂપિયા વિથડ્રો કરવા દીધા હતા.

વધુ પૈસાની માંગણી થતા ભાંડો ફૂટ્યો :
જ્યારે શૈલેષભાઈએ પોતાનું રોકાણ અને નફો પરત લેવાનો પ્રયાસ કર્યો, ત્યારે ગઠિયાઓએ ટેક્સ અને અન્ય ચાર્જના બહાને વધુ પૈસાની માંગણી કરી હતી. છેતરપિંડી થઈ હોવાનો અહેસાસ થતા તેમણે તુરંત સાયબર હેલ્પલાઇન 1930 પર સંપર્ક કર્યો હતો. આ મામલે ગાંધીનગર રેન્જ સાયબર ક્રાઈમ પોલીસે ભારતીય ન્યાય સંહિતા અને IT એક્ટ હેઠળ અજાણ્યા ગઠિયાઓ વિરુદ્ધ ગુનો નોંધી આગળની કાર્યવાહી હાથ ધરી છે.

નકલી પ્રોફિટના સ્ક્રીનશોટ બતાવી વિશ્વાસ જીત્યો :
આ ગ્રુપમાં અન્ય સભ્યો દ્વારા મેળવવામાં આવેલા નકલી પ્રોફિટના સ્ક્રીનશોટ અવારનવાર મુકવામાં આવતા હતા. ત્યારબાદ તેમને ‘VIP ગ્રુપ C99’માં ઉમેરવામાં આવ્યા, જ્યાં શેરબજારમાં લે-વેચની ટિપ્સ આપવામાં આવતી હતી. ગઠિયાઓએ શૈલેષભાઈને એક એપ્લિકેશન ડાઉનલોડ કરાવી હતી, જે દેખાવમાં અસલ UTI AMC જેવી જ હતી. તેમાં તેમણે પોતાનું આઈડી બનાવી બેંકની વિગતો ભરી હતી.