અમદાવાદના મેઘાણીનગર વિસ્તારમાં પિતૃત્વના વિવાદને લઈને એક ચોંકાવનારો કિસ્સો સામે આવ્યો છે. ઓનલાઈન મેટ્રિમોનિયલ સાઈટ દ્વારા થયેલા લગ્નનો અંત પોલીસ ફરિયાદમાં આવ્યો છે. પત્નીએ ‘બાળક તમારું નથી’ તેમ કહેતા મામલો બિચક્યો છે.
લગ્ન બાદ પિતૃત્વ પર સવાલ
પોલીસ ફરિયાદ અનુસાર, કુબેરનગરના રહેવાસી 32 વર્ષીય મોહિત ખટનાએ ડિસેમ્બર 2024માં નાગપુરની ખુશી નામની યુવતી સાથે લગ્ન કર્યા હતા. આ બંનેની મુલાકાત એક ઓનલાઈન મેટ્રિમોનિયલ પ્લેટફોર્મ દ્વારા થઈ હતી. લગ્ન બાદ પત્ની અમદાવાદ રહેવા આવી હતી. પત્ની ગર્ભવતી થતા ડિલિવરી માટે નાગપુર તેના પિયર ગઈ હતી. આ દરમિયાન 28મી જાન્યુઆરી 2026ના રોજ પુત્રીના જન્મ બાદ જ્યારે મોહિત નાગપુર ગયો, ત્યારે તેની પત્નીએ એવું કહીને ચોંકાવી દીધો હતો કે ‘આ બાળક તમારું નથી’. આ નિવેદન બાદ બંને પરિવારો વચ્ચે ભારે તણાવ સર્જાયો હતો.
28 જાન્યુઆરી 2026ના રોજ પુત્રીનો જન્મ થયો હતો. મોહિત જ્યારે પુત્રીને જોવા નાગપુર ગયો ત્યારે તેની પત્નીએ મોટો ધડાકો કર્યો હતો. પત્નીએ સ્પષ્ટ શબ્દોમાં કહ્યું કે, “આ બાળક તમારું નથી.” આ વાત સાંભળીને પતિના પગ નીચેથી જમીન સરકી ગઈ હતી.
સાસરિયાઓ દ્વારા જાનથી મારી નાખવાની ધમકી
મોહિતના જણાવ્યા અનુસાર, આ બાબતે વિવાદ થતા સાસરિયાઓએ પક્ષપાત શરૂ કર્યો હતો. 6 ફેબ્રુઆરીએ સાસુ લલિતાએ ફોન પર અપશબ્દો બોલી ધમકી આપી હતી. ત્યારબાદ 19 માર્ચે સસરા મોહન મોટઘરેએ ફોન કરીને ધમકી આપી કે, “જો નાગપુર આવ્યો તો જીવતો નહીં જાય.”
પોલીસ તપાસ શરૂ
સતત મળતી ધમકીઓ અને પત્નીના વર્તનથી કંટાળીને મોહિતે અંતે અમદાવાદના મેઘાણીનગર પોલીસ મથકે ફરિયાદ નોંધાવી છે. પોલીસે સાસરિયાઓ વિરુદ્ધ માનસિક ત્રાસ અને ધમકીનો ગુનો નોંધીને તપાસ હાથ ધરી છે.
