મધ્યપ્રદેશના કૂનો નેશનલ પાર્કમાંથી વન્યજીવ પ્રેમીઓ માટે મોટા સમાચાર આવ્યા છે. નામિબિયાથી લાવવામાં આવેલી માદા ચિત્તા ‘જ્વાલા’એ એકસાથે 5 સ્વસ્થ બચ્ચાને જન્મ આપ્યો છે. આ સાથે જ ભારતમાં ચિત્તાઓની કુલ સંખ્યા હવે 50નો આંકડો વટાવી ગઈ છે.
‘પ્રોજેક્ટ ચિત્તા’ માટે 9 માર્ચનો દિવસ ઐતિહાસિક
ભારતના મહત્વાકાંક્ષી ‘પ્રોજેક્ટ ચિત્તા’ માટે સોમવારનો દિવસ સુવર્ણ અક્ષરે લખાઈ ગયો છે. શ્યોપુર સ્થિત કૂનો નેશનલ પાર્કમાં જ્વાલાની આ ત્રીજી સફળ ડિલિવરી છે. આ સાબિત કરે છે કે ચિત્તાઓ હવે ભારતના વાતાવરણમાં સંપૂર્ણ રીતે ભળી ગયા છે.
કૂનોમાં કુલ ચિત્તા: 50
ભારતમાં જન્મેલા બચ્ચાઓનો દબદબો
નિષ્ણાતોના મતે, કૂનોમાં અત્યારે કુલ 50 ચિત્તાઓ છે. આશ્ચર્યની વાત એ છે કે, તેમાંથી 33 બચ્ચા તો ભારતની ધરતી પર જ જન્મ્યા છે. એટલે કે કુલ સંખ્યાના 62% ચિત્તાઓ ભારતીય મૂળના છે. જ્વાલા અને તેના પાંચેય બચ્ચા હાલ સંપૂર્ણ સ્વસ્થ છે. ડોક્ટરોની ટીમ 24 કલાક તેમના પર નજર રાખી રહી છે.
જ્વાલા એ જ 8 ચિત્તાઓમાંથી એક છે, જેને વડાપ્રધાન નરેન્દ્ર મોદીએ સપ્ટેમ્બર 2022માં કૂનોમાં છોડ્યા હતા.
જ્વાલાનો શાનદાર રેકોર્ડ
માદા ચિત્તા જ્વાલાએ અત્યાર સુધીમાં ત્રણ વાર બચ્ચાને જન્મ આપ્યો છે:
- માર્ચ 2023: 4 બચ્ચા (જેમાંથી એક ‘મુખી’ જીવિત છે).
- જાન્યુઆરી 2024: 3 બચ્ચા.
- 9 માર્ચ 2026: 5 બચ્ચા (નવા મહેમાન).
વધતું જતું ચિત્તાઓનું કુટુંબ
તાજેતરમાં દક્ષિણ આફ્રિકાની માદા ચિત્તા ‘ગામિની’એ પણ 4 બચ્ચાને જન્મ આપ્યો હતો. આ સિવાય 28 ફેબ્રુઆરીએ બોત્સ્વાનાથી પણ 9 નવા ચિત્તાઓ લાવવામાં આવ્યા છે. સતત વધતી સંખ્યાને કારણે કૂનો હવે વિશ્વનું મહત્વનું ચિત્તા સંરક્ષણ કેન્દ્ર બની ગયું છે.
કેન્દ્રીય પર્યાવરણ મંત્રી ભૂપેન્દ્ર યાદવ અને મુખ્યમંત્રી મોહન યાદવે સોશિયલ મીડિયા પર આ સફળતા બદલ વન વિભાગની ટીમને અભિનંદન પાઠવ્યા છે.
‘રાષ્ટ્રપતિ ઊભા છે અને તમે બેઠા છો?’ જૂની તસવીર બતાવી મમતા બેનર્જીનો PM મોદી પર વળતો પ્રહાર
