આઈપીએલ 2026 (IPL 2026) નો ખિતાબ ભલે રોયલ ચેલેન્જર્સ બેંગલુરુ (RCB) એ જીત્યો હોય. પરંતુ આ આખી સીઝન ૧૫ વર્ષના યુવા ખેલાડી વૈભવ સૂર્યવંશીના નામે રહી છે. રાજસ્થાન રોયલ્સ (RR) તરફથી રમતા વૈભવ સૂર્યવંશીએ પોતાની તોફાની બેટિંગથી ઈતિહાસ રચી દીધો છે.
તેણે આ સીઝનમાં મોસ્ટ વેલ્યુએબલ પ્લેયર (MVP) સહિત કુલ 5 મોટા એવોર્ડ્સ પોતાના નામે કર્યા છે. વૈભવે આ સીઝનની 16 ઇનિંગ્સમાં 237.30 ના અદ્ભુત સ્ટ્રાઈક રેટથી 776 રન બનાવ્યા છે. આ દરમિયાન તેણે ૧ સદી અને ૫ અર્ધસદી ફટકારી છે.
વૈભવ સૂર્યવંશીની કમાણી: કયા એવોર્ડ માટે કેટલા પૈસા મળ્યા?
વૈભવ સૂર્યવંશીએ એવોર્ડ્સની સાથે કરોડો ફેન્સના દિલ અને મોટી ઈનામી રકમ પણ જીતી છે. તેને મળેલા એવોર્ડ્સ અને કમાણીનું લિસ્ટ નીચે મુજબ છે:
-
મોસ્ટ વેલ્યુએબલ પ્લેયર (MVP): 15 લાખ રૂપિયા
-
ઓરેન્જ કેપ (સૌથી વધુ રન): 10 લાખ રૂપિયા
-
સુપર સ્ટ્રાઈકર ઓફ ધ સીઝન: 10 લાખ રૂપિયા (સાથે ટાટા સિયેરા કાર)
-
સુપર સિક્સ ઓફ ધ સીઝન: 10 લાખ રૂપિયા
-
ઇમર્જિંગ પ્લેયર ઓફ ધ સીઝન: 10 લાખ રૂપિયા
(નોંધ: સુપર સ્ટ્રાઈકર એવોર્ડમાં મળેલી ટાટા સિયેરા કારની કિંમત આશરે 11.49 લાખથી શરૂ થઈને 21.29 લાખ રૂપિયા સુધીની છે.)
આઈપીએલના ઈતિહાસમાં પહેલીવાર બન્યો આ રેકોર્ડ
વૈભવ સૂર્યવંશીએ આ સીઝનમાં એવા રેકોર્ડ બનાવ્યા છે જે આજ સુધી કોઈ કરી શક્યું નથી.
-
ડબલ ધમાકો: આઈપીએલના ઈતિહાસમાં વૈભવ પહેલો એવો ખેલાડી બન્યો છે, જેણે એક જ સીઝનમાં MVP અને ઇમર્જિંગ પ્લેયર બંને એવોર્ડ જીત્યા હોય.
-
ક્રિસ ગેલની બરાબરી: વર્ષ 2011 માં ક્રિસ ગેલ પછી વૈભવ એવો પહેલો ખેલાડી છે, જે એક જ સીઝનમાં રન અને સ્ટ્રાઈક રેટ બંને ચાર્ટમાં ટોપ પર રહ્યો છે.
-
સૌથી વધુ સિક્સર: વૈભવે આ સીઝનમાં કુલ 72 સિક્સ ફટકારી છે. આ આઈપીએલની કોઈપણ એક સીઝનમાં કોઈ બેટ્સમેન દ્વારા ફટકારવામાં આવેલી સૌથી વધુ સિક્સ છે.
-
ડેવિડ વોર્નરનો રેકોર્ડ તૂટ્યો: તે પાવરપ્લેમાં સૌથી વધુ રન બનાવનાર બેટ્સમેન બન્યો છે અને તેણે ડેવિડ વોર્નરનો રેકોર્ડ તોડી નાખ્યો છે. આ સાથે જ તે આઈપીએલમાં સૌથી ઓછી બોલમાં ૧ હજાર રન પૂરા કરનાર ખેલાડી પણ બની ગયો છે.
દિગ્ગજ બોલરોને બરાબરનો ધોયો
જસપ્રિત બુમરાહ, મોહમ્મદ સિરાજ અને કગિસો રબાડા જેવા દુનિયાના શ્રેષ્ઠ બોલરોએ વૈભવ સામે અલગ-અલગ પ્લાન બનાવ્યા હતા. પરંતુ આ ૧૫ વર્ષના બાળકે બધાનો ડટકો સામનો કર્યો. બુમરાહના પહેલા જ બોલ પર વૈભવે મારેલી સિક્સ આ સીઝનની સૌથી યાદગાર ક્ષણ બની ગઈ છે.
એવોર્ડ જીત્યા બાદ વૈભવે કહ્યું, “ખૂબ સારું લાગી રહ્યું છે, પણ અત્યારે ઇન્ટરવ્યુ આપતી વખતે થોડું પ્રેશર પણ છે. આ મારા માટે ગર્વની ક્ષણ છે. હું આગામી સીઝનમાં પણ આવું જ પ્રદર્શન કરવાનો પ્રયત્ન કરીશ. હું બસ મારા ગેમ પર ધ્યાન આપું છું. જો બોલ હિટ કરવા જેવો હોય તો હું પૂરી તાકાત લગાવી દઉં છું.”
< /p>
