IPL 2026 ની 35મી મેચ પહેલા દિલ્હી કેપિટલ્સના કેમ્પમાંથી ચિંતાજનક સમાચાર સામે આવ્યા છે. પંજાબ કિંગ્સ સામેની મેચના એક દિવસ પહેલા પ્રેક્ટિસ સેશન દરમિયાન એક યુવા ખેલાડી ગંભીર રીતે ઈજાગ્રસ્ત થયો છે.
પ્રેક્ટિસ દરમિયાન સર્જાઈ દુર્ઘટના
દિલ્હીના અરુણ જેટલી સ્ટેડિયમમાં પ્રેક્ટિસ ચાલી રહી હતી ત્યારે દિલ્હી કેપિટલ્સના એક નેટ બોલરને બાઉન્સર બોલ સીધો મોઢા પર વાગ્યો હતો. બોલ વાગતાની સાથે જ ખેલાડી મેદાન પર ફસડાઈ પડ્યો હતો અને તેના મોઢામાંથી લોહી નીકળવા લાગ્યું હતું.
તાત્કાલિક હોસ્પિટલ ખસેડાયો
ઘટનાની ગંભીરતા જોઈને દિલ્હી કેપિટલ્સનો મેડિકલ સ્ટાફ અને સ્ટેડિયમમાં હાજર ઈમરજન્સી ટીમ તાત્કાલિક મેદાન પર પહોંચી હતી. ખેલાડીને સ્ટ્રેચર પર સૂવડાવીને મેદાન પર જ ઉભી રહેલી એમ્બ્યુલન્સ મારફતે સીધો હોસ્પિટલ લઈ જવામાં આવ્યો હતો. હાલમાં આ ખેલાડીની સ્થિતિ અંગે દિલ્હી કેપિટલ્સ દ્વારા કોઈ સત્તાવાર નિવેદન જાહેર કરવામાં આવ્યું નથી.
દિલ્હી અને પંજાબ વચ્ચે મહત્વની મેચ
25 એપ્રિલના રોજ દિલ્હી કેપિટલ્સ અને પંજાબ કિંગ્સ વચ્ચે મુકાબલો થવાનો છે. દિલ્હી માટે આ મેચ ખૂબ જ મહત્વની છે:
-
દિલ્હીની સ્થિતિ: અત્યાર સુધી 6 મેચમાંથી 3 જીત અને 3 હાર સાથે પોઈન્ટ ટેબલમાં છઠ્ઠા ક્રમે છે.
-
પંજાબની સ્થિતિ: આ સીઝનમાં પંજાબ કિંગ્સ અજેય રહી છે. તેમણે 6 માંથી 5 મેચ જીતી છે અને એક મેચ વરસાદને કારણે રદ થઈ હતી.
પંજાબ જેવી મજબૂત ટીમ સામે મેદાનમાં ઉતરતા પહેલા નેટ બોલરની આ ઈજાએ દિલ્હીની ટીમને આંચકો આપ્યો છે.
