દિલ્હીના જંતર-મંતર પર ચાલી રહેલા પ્રદર્શન વચ્ચે એક ચોંકાવનારી ઘટના સામે આવી છે. શનિવારે (18 જુલાઈ) સીજેપી (CJP) ના સ્થાપક અભિજીત દીપકે પર એક મહિલાએ લાઈવ સ્ટેજ પર શાહી ફેંકી હતી. આ ઘટના બાદ શાહી ફેંકનાર મહિલા બરખા ત્રેહન સોશિયલ મીડિયા પર જોરદાર ચર્ચામાં આવી ગઈ છે.
શા માટે ફેંકી શાહી?
ઘટના બપોરે આશરે 1:20 વાગ્યે બની હતી. અભિજીત દીપકે જ્યારે સોનમ વાંગચુકના સમર્થનમાં લોકોને સંબોધિત કરી રહ્યા હતા, ત્યારે બરખાએ તેમના પર શાહી ફેંકી દીધી. આ હુમલા બાદ ત્યાં હાજર લોકોએ મહિલાને પકડીને પોલીસને હવાલે કરી હતી.
બરખા ત્રેહને સોશિયલ મીડિયા પર પોસ્ટ કરીને આ અંગે સફાઈ આપી છે. તેણે લખ્યું, “હા, હું જ એ મહિલા છું જેણે કટ્ટરપંથી અર્બન નક્સલ અભિજીત દીપકે પર શાહી ફેંકી છે. તેણે મારા પ્રભુ શ્રીરામનું અપમાન કર્યું હતું અને તેના મંચ પર હસી ઉડાવી હતી. હું એક કટ્ટર હિન્દુ છું અને આ મારો વિરોધ હતો.” બરખાએ એવો પણ આરોપ લગાવ્યો કે ઘટના બાદ પ્રદર્શનકારીઓએ તેની સાથે મારપીટ કરી હતી.
કોણ છે બરખા ત્રેહન?
બરખા ત્રેહન એક સામાજિક કાર્યકર્તા (Social Activist) છે. તે ભારતમાં પુરુષોના અધિકારો માટે અવાજ ઉઠાવવા માટે જાણીતી છે. તે ‘પુરુષ આયોગ’ નામના સંગઠનની અધ્યક્ષ પણ છે.
આ સંગઠન પુરુષોના કાયદાકીય અધિકારો અને જેન્ડર કાયદાઓમાં સુધારા માટે કામ કરે છે. બરખાએ દહેજ અને ઘરેલું હિંસાના કાયદાના કથિત દુરુપયોગ સામે અવાજ ઉઠાવ્યો છે. તે ભારતમાં વૈધાનિક ‘પુરુષ આયોગ’ સ્થાપવાની માંગ કરી રહી છે.
વિવાદો સાથે જૂનો સંબંધ
બરખા ત્રેહન અગાઉ પણ ઘણા વિવાદોમાં રહી ચૂકી છે. ઉન્નાવ રેપ કેસના આરોપી પૂર્વ ભાજપ ધારાસભ્ય કુલદીપ સિંહ સેંગરના સમર્થન કરવા બદલ તેની ભારે આલોચના થઈ હતી. પોલીસના જણાવ્યા અનુસાર, ડિસેમ્બર 2025માં પણ તેણે પુરુષ આયોગ તરફથી સેંગરના સમર્થનમાં જંતર-મંતર પર એક પ્રદર્શનનું આયોજન કર્યું હતું.
