ભારત અને ઇંગ્લેન્ડ વચ્ચે લોર્ડ્સના મેદાન પર ત્રીજી અને છેલ્લી વનડે મેચ રમાઈ રહી છે. આ મેચમાં બંને ટીમના ખેલાડીઓ અને સપોર્ટ સ્ટાફ હાથ પર કાળી પટ્ટી (Black Armband) બાંધીને મેદાન પર ઉતર્યા છે. મેચ શરૂ થતા પહેલા તમામ ખેલાડીઓએ એક મિનિટનું મૌન પણ રાખ્યું હતું.
સર ગેરી સોબર્સને આપવામાં આવી શ્રદ્ધાંજલિ
વેસ્ટ ઈન્ડિઝના મહાન ક્રિકેટર સર ગેરી સોબર્સનું તાજેતરમાં જ નિધન થયું છે. 17 જુલાઈએ 89 વર્ષની વયે તેમણે અંતિમ શ્વાસ લીધા હતા. આ મહાન ખેલાડીને સન્માન અને શ્રદ્ધાંજલિ આપવા માટે ખેલાડીઓએ કાળી પટ્ટી બાંધી છે. ભારતીય ક્રિકેટ કંટ્રોલ બોર્ડ (BCCI) એ પણ સોશિયલ મીડિયા પર આ અંગેની માહિતી શેર કરી છે.
ટીમ ઇન્ડિયામાં ત્રણ મોટા ફેરફાર
આ નિર્ણાયક મેચમાં ઇંગ્લેન્ડના કેપ્ટન હેરી બ્રુકે ટોસ જીતીને પહેલા બેટિંગ કરવાનો નિર્ણય કર્યો છે. ટીમ ઇન્ડિયા આ મેચમાં ત્રણ મોટા ફેરફાર સાથે મેદાન પર ઉતરી છે. સ્ટાર ફાસ્ટ બોલર જસપ્રિત બુમરાહ ઘૂંટણની ઈજાના કારણે આ મેચ રમી રહ્યો નથી. આ સિવાય વોશિંગ્ટન સુંદર અને શિવમ દુબે પણ પ્લેઈંગ ઈલેવનની બહાર છે. આ ત્રણેય ખેલાડીઓના સ્થાને અર્શદીપ સિંહ, પ્રિન્સ યાદવ અને કેએલ રાહુલને ટીમમાં સામેલ કરવામાં આવ્યા છે.
બંને ટીમોની પ્લેઈંગ ઈલેવન (Playing XI)
-
ભારત: રોહિત શર્મા, શુભમન ગિલ (કેપ્ટન), વિરાટ કોહલી, ઈશાન કિશન, શ્રેયસ અય્યર, કેએલ રાહુલ (વિકેટકીપર), અક્ષર પટેલ, ગુરનૂર બ્રાર, પ્રિન્સ યાદવ, અર્શદીપ સિંહ, પ્રસિદ્ધ ક્રિષ્ના.
-
ઇંગ્લેન્ડ: બેન ડકેટ, જેકબ બેથેલ, જો રૂટ, હેરી બ્રુક (કેપ્ટન), જોસ બટલર (વિકેટકીપર), સેમ કરન, વિલ જેક્સ, ગસ એટકિન્સન, જોફ્રા આર્ચર, આદિલ રશીદ, જોશ ટંગ.
હાલમાં ત્રણ મેચોની આ વનડે સિરીઝ ખૂબ જ રોમાંચક મોડ પર છે. જે પણ ટીમ આ ત્રીજી મેચ જીતશે, તે સિરીઝ પોતાના નામે કરી લેશે.
