અમેરિકા અને ઈરાન ઐતિહાસિક કરારની નજીક, પાકિસ્તાન બન્યું મધ્યસ્થ; શું હવે યુદ્ધ અટકી જશે?

અમેરિકા અને ઈરાન વચ્ચે છેલ્લા ઘણા સમયથી ચાલી રહેલો તણાવ હવે સમાપ્ત થવાના આરે છે. બંને દેશો એક મોટા શાંતિ કરારની ખૂબ જ નજીક પહોંચી ગયા છે. આ કરારમાં પાકિસ્તાન મધ્યસ્થ (Mediator) ની ભૂમિકા ભજવી રહ્યું છે. પાકિસ્તાનના જણાવ્યા અનુસાર, ટૂંક સમયમાં જ આ ડીલ પર અંતિમ નિર્ણય લેવામાં આવશે.

જો કે, વાટાઘાટોની વચ્ચે પણ સરહદ પર તણાવ ચાલુ છે. તાજેતરમાં જ અમેરિકી સેનાએ ઈરાનના એવા કેટલાક ‘વન-વે અટેક ડ્રોન’ હવામાં જ તોડી પાડ્યા હતા, જે હોર્મુઝની ખાડી (Strait of Hormuz) તરફ વધી રહ્યા હતા.

આવો જાણીએ આ યુદ્ધ અને શાંતિ કરારથી જોડાયેલા તમામ મહત્વના લાઈવ અપડેટ્સ:

કરારની મુખ્ય શરતો અને મોટી વિગતો

• હોર્મુઝની ખાડી ફરી ખુલશે: પાકિસ્તાનના વડાપ્રધાનના જણાવ્યા અનુસાર, આ ડીલ થવાથી હોર્મુઝની ખાડીને ફરીથી આંતરરાષ્ટ્રીય ટ્રાફિક માટે ખોલી દેવામાં આવશે અને દરિયાઈ નાકેબંધી ખતમ થશે.

• પ્રતિબંધો હટશે અને ફંડ રિલીઝ થશે: કરાર હેઠળ ઈરાન પર લાગેલા આર્થિક પ્રતિબંધો તબક્કાવાર હટાવવામાં આવશે. સાથે જ તેની ફ્રીઝ થયેલી સંપત્તિ પણ પાછી મળશે.

• અણુ કાર્યક્રમ પર રોક: વ્હાઇટ હાઉસના અધિકારીએ જણાવ્યું કે આ કરારથી ઈરાનનો પરમાણુ કાર્યક્રમ બંધ થઈ જશે. ઈરાને પોતાના દેશમાંથી એનરિચ્ડ યુરેનિયમ (Enriched Uranium) બહાર મોકલવું પડશે.

ટ્રમ્પે નેતન્યાહુને કહ્યું- આ યુદ્ધ ખતમ કરવાનો સમય છે

અમેરિકી રાષ્ટ્રપતિ ડોનાલ્ડ ટ્રમ્પે ઈઝરાયેલના પીએમ બેન્જામિન નેતન્યાહુ સાથે ફોન પર વાતચીત કરી છે. ટ્રમ્પે આશા વ્યક્ત કરી છે કે આગામી થોડા દિવસોમાં જ ઈરાન સાથે ડીલ થઈ જશે. આ એક શાનદાર કરાર છે અને હવે યુદ્ધ રોકવાનો સમય આવી ગયો છે. ઈરાનના વિદેશ મંત્રી અબ્બાસ અરાગચીએ પણ ટ્વિટ કર્યું કે ‘ઇસ્લામાબાદ કરાર’ હવે ખૂબ નજીક છે.

પીએમ નેતન્યાહુનું મોટું નિવેદન- ઈરાનને પરમાણુ બોમ્બ નહીં બનાવવા દઉં

ઈઝરાયેલના વડાપ્રધાન બેન્જામિન નેતન્યાહુએ આ ડીલ વચ્ચે કડક વલણ અપનાવ્યું છે. તેમણે કહ્યું, “હું જીવતો છું ત્યાં સુધી ઈરાનને પરમાણુ હથિયાર બનાવવા નહીં દઉં. ઈરાન ઈઝરાયેલને નષ્ટ કરવા માંગે છે, પરંતુ હું તેમને સફળ થવા દઈશ નહીં.” ઈરાનના વિદેશ મંત્રીએ પણ આરોપ લગાવ્યો છે કે ઈઝરાયેલ આ શાંતિ કરારને તોડવાનો પ્રયાસ કરી રહ્યું છે.

ઈરાનને કોઈ એડવાન્સ કેશ નહીં મળે: જેડી વેન્સ

અમેરિકાના ઉપરાષ્ટ્રપતિ જેડી વેન્સે સોશિયલ મીડિયા પર ચાલી રહેલી અફવાઓ પર સ્પષ્ટતા કરી છે. તેમણે કહ્યું કે ઈરાનને કોઈ મફતની આર્થિક રાહત આપવામાં આવી નથી. માત્ર મીટિંગમાં આવવા કે કરાર પર સાઇન કરવા માટે ઈરાનને કોઈ રોકડ રકમ કે ફંડ આપવામાં આવશે નહીં. ઈરાન જ્યારે પોતાના વાયદા પૂરા કરશે, ત્યારે જ તેને આર્થિક ફાયદો મળશે.

હોર્મુઝની ખાડી પર ઈરાન વસૂલશે ‘સર્વિસ ફી’

દરમિયાન, ઈરાને સંકેત આપ્યો છે કે તે હોર્મુઝની ખાડી (Strait of Hormuz) પર પોતાનો દબદબો જાળવી રાખશે. વિદેશ મંત્રી અરાગચીએ જણાવ્યું કે આંતરરાષ્ટ્રીય કાયદો અહીંથી પસાર થતા જહાજો પર ટેક્સ લગાવવાની મંજૂરી નથી આપતો, પરંતુ ઈરાન અહીં સુરક્ષા આપવા બદલ ‘સર્વિસ ફી’ વસૂલ કરી રહ્યું છે અને આ મુદ્દો અમેરિકા સાથેની વાતચીતનો એક ભાગ છે.

< /p>