અમેરિકા, ઈઝરાયેલ અને ઈરાન વચ્ચે ચાલી રહેલા ભયાનક યુદ્ધને આજે 24 દિવસ પૂરા થયા છે. એક તરફ શાંતિ માટે મધ્યસ્થતાના પ્રયાસો તેજ થયા છે, તો બીજી તરફ રણમેદાનમાં હુમલાઓ વધુ તીવ્ર બન્યા છે. યુદ્ધની આગ હવે પડોશી દેશો સુધી પહોંચી છે. કુવૈતના એર ડિફેન્સ સિસ્ટમે ઈરાની ડ્રોન અને મિસાઈલોને તોડી પાડ્યા હતા. આ મિસાઈલોનો કાટમાળ હાઈ-વોલ્ટેજ વીજ લાઈનો પર પડતા કુવૈતમાં અનેક વિસ્તારોમાં વીજળી ગુલ થઈ ગઈ છે.
ઈરાનના પાવર સ્ટેશન અને ગેસ ગ્રીડ પર હુમલો
ડોનાલ્ડ ટ્રમ્પે હુમલા રોકવાની વાત કરી હોવા છતાં, સોમવાર અને મંગળવારની મધ્યરાત્રિએ ઈરાનના ખુર્રમશહર અને ઇસ્ફહાન શહેરો પર ભીષણ હુમલા થયા છે. આ હુમલામાં ઈરાનનું પાવર ગ્રીડ અને ગેસ સપ્લાય નેટવર્ક ધ્વસ્ત થઈ ગયું છે. પાઈપલાઈન ફાટવાને કારણે વીજ ઉત્પાદન ઠપ થઈ ગયું છે.
કુવૈતમાં ‘બ્લેકઆઉટ’ની સ્થિતિ
યુદ્ધની આગ હવે પડોશી દેશો સુધી પહોંચી છે. કુવૈતના એર ડિફેન્સ સિસ્ટમે ઈરાની ડ્રોન અને મિસાઈલોને તોડી પાડ્યા હતા. આ મિસાઈલોનો કાટમાળ હાઈ-વોલ્ટેજ વીજ લાઈનો પર પડતા કુવૈતના અનેક વિસ્તારોમાં વીજળી ગુલ થઈ ગઈ છે.
બેરૂત અને ઈરાકમાં ભારે તબાહી
-
લેબનાન: ઈઝરાયેલની સેના (IDF) એ બેરૂતમાં હિઝબુલ્લાહના ઠેકાણાઓ પર શ્રેણીબદ્ધ હવાઈ હુમલા કર્યા છે. હુમલા પહેલા ચેતવણી અપાતા હજારો લોકો જીવ બચાવીને ભાગ્યા હતા.
-
ઈરાક: અનબાર પ્રાંતમાં PMF ના હેડક્વાર્ટર પર થયેલા હુમલામાં કમાન્ડર સાદ અલ-બેજી સહિત 6 લડાયકોના મોત થયા છે.
ટ્રમ્પનો દાવો vs ઈરાનનો ઈન્કાર
ડોનાલ્ડ ટ્રમ્પે દાવો કર્યો છે કે તેહરાન સાથે “સકારાત્મક વાતચીત” ચાલી રહી છે અને 5 દિવસ માટે હુમલા રોકવામાં આવ્યા છે. જોકે, ઈરાને ટ્રમ્પના આ દાવાને ‘ફેક ન્યૂઝ’ ગણાવ્યા છે. બીજી તરફ ઈઝરાયેલના પીએમ નેતન્યાહુએ સ્પષ્ટ કર્યું છે કે સુરક્ષાની ગેરંટી વગર હુમલા ચાલુ રહેશે.
ગેસ કટોકટી: ઈટાલીની દોડધામ
કતાર દ્વારા ગેસ સપ્લાય રોકી દેવાતા યુરોપમાં ફફડાટ છે. ઈટાલીના વડાપ્રધાન જ્યોર્જિયા મેલોની તાત્કાલિક અલ્જીરિયાની મુલાકાતે જઈ રહ્યા છે જેથી દેશની ઉર્જા જરૂરિયાતો પૂરી કરી શકાય.
આગળ શું થશે?
હાલ દુનિયાની નજર હોર્મુઝ સ્ટ્રેટ પર છે, જ્યાંથી વિશ્વનો મોટો તેલ પુરવઠો પસાર થાય છે. જો ઈસ્લામાબાદમાં સૂચિત શાંતિ વાટાઘાટો સફળ રહેશે, તો જ આ યુદ્ધનો અંત આવી શકે તેમ છે.
