મિડલ ઈસ્ટ (મધ્ય પૂર્વ)માં ચાલી રહેલો તણાવ ઘટવાનું નામ નથી લઈ રહ્યો. એક તરફ યુદ્ધ અટકતું નથી, તો બીજી તરફ કાચા તેલના ભાવ સતત વધી રહ્યા છે. આ દરમિયાન અમેરિકાના રાષ્ટ્રપતિ ડોનાલ્ડ ટ્રમ્પ અને ઈરાન વચ્ચે મંગળવારે દોહા માં યોજાનારી સંભવિત બેઠક અંગે મોટો સસ્પેન્સ ઊભો થયો છે.
ડોનાલ્ડ ટ્રમ્પનો સોશિયલ મીડિયા પર દાવો
યુએસ પ્રમુખ ડોનાલ્ડ ટ્રમ્પે તેમના સોશિયલ મીડિયા પ્લેટફોર્મ ‘ટ્રુથ સોશિયલ’ (Truth Social) પર એક મોટી જાહેરાત કરી હતી. ટ્રમ્પે કેપિટલ અક્ષરોમાં લખ્યું કે, “ઈરાને પોતે જ બેઠકની વિનંતી કરી છે. આ મહત્વની મીટિંગ મંગળવારે કતારની રાજધાની દોહા માં યોજાશે.” આ સાથે જ ટ્રમ્પે તેલની વધતી કિંમતો માટે પણ ઈરાનને જવાબદાર ઠેરવ્યું છે.
ઈરાને વાતચીતનો સ્પષ્ટ ઇનકાર કર્યો
બીજી તરફ, ઈરાને અમેરિકા સાથે કોઈ પણ પ્રકારની વાતચીત હોવાનો સ્પષ્ટ ઈનકાર કર્યો છે. ઈરાનના ડેપ્યુટી વાઇસ ફોરેન મિનિસ્ટર કાઝેમ ગરીબાબાદીએ જણાવ્યું કે, આ અઠવાડિયે કતારમાં અમેરિકી અધિકારીઓની ટેકનિકલ ટીમ સાથે કોઈ બેઠક નક્કી નથી. હોર્મુઝ કટોકટી અને હુમલા બાદ ઈરાને પોતાનું વલણ કડક રાખ્યું છે.
શાંતિ કરાર છતાં ફરી ભડક્યું યુદ્ધ
આ વિવાદ પહેલાં બંને દેશો વચ્ચે શાંતિના સંકેત મળ્યા હતા.
-
એક અઠવાડિયા પહેલાં સ્વિટ્ઝરલેન્ડમાં એક મહત્વની બેઠક થઈ હતી.
-
આ બેઠક અમેરિકી ઉપરાષ્ટ્રપતિ જેડી વેન્સ અને ઈરાનના સ્પીકર મોહમ્મદ બાકર કલીબાફ વચ્ચે થઈ હતી.
-
આ મીટિંગ બાદ તેહરાન (ઈરાન) પરથી પ્રતિબંધો હટાવી લેવામાં આવ્યા હતા.
પરંતુ આ શાંતિ કરાર લાંબો સમય ટક્યો નહીં. બહેરીન અને કુવૈતમાં આવેલા અમેરિકી સૈન્ય મથકો પર ઈરાનના હુમલાના અહેવાલો સામે આવ્યા છે. બીજી તરફ ઈઝરાયેલે પણ દક્ષિણ લેબનાનમાં હિઝબુલ્લાહ પર ફરીથી હુમલા શરૂ કરી દીધા છે. આ સ્થિતિ જોતાં મિડલ ઈસ્ટમાં શાંતિ સ્થાપવાના તમામ પ્રયાસો અત્યારે નિષ્ફળ જતા દેખાય છે.
