ઝારખંડના પાટનગર રાંચીમાં JPSC પરીક્ષા ગેરરીતિ અને પેપર લીકની CBI તપાસની માંગ સાથે શરૂ થયેલું વિદ્યાર્થી આંદોલન સોમવારે અત્યંત ઉગ્ર સ્વરૂપ ધારણ કરી ચૂક્યું છે. ‘વિધાનસભા ઘેરાવ’ માર્ચ દરમિયાન તમામ સુરક્ષા બેરિકેડ્સ તોડીને સેંકડોની સંખ્યામાં વિદ્યાર્થીઓ ઝારખંડ વિધાનસભા પરિસરમાં ઘૂસી ગયા હતા અને ગેટ નંબર 1 પર જમાવડો કર્યો હતો.
કાંટાળા તાર ઊંચકી ગયા વિદ્યાર્થીઓ, રોડ પર સૂઈને વિરોધ
પોલીસે માર્ચને રોકવા માટે રસ્તાઓ પર કાંટાળા તાર અને ભારે બેરિકેડ્સ ગોઠવ્યા હતા. પરંતુ આક્રોશિત વિદ્યાર્થીઓ આ કાંટાળા તારોને પોતાના હાથ વડે ઊંચકીને દૂર ફેંકી આગળ વધી ગયા હતા. પરિસ્થિતિ એ હદે વણસી હતી કે સેંકડો વિદ્યાર્થીઓ સંકુલની અંદર પહોંચી ગયા હતા અને કેટલાંક પ્રદર્શનકારીઓ રસ્તા પર જ સૂઈને સરકાર વિરૂદ્ધ નારેબાજી કરવા લાગ્યા હતા.
સ્થિતિ કાબૂ બહાર જતી જોઈને પ્રશાસને ઝારખંડના અન્ય જિલ્લાઓની પોલીસને તાત્કાલિક અસરથી રાંચી પહોંચવાનો આદેશ આપ્યો હતો.
#WATCH | JPSC-JSSC aspirants' protest in Ranchi: Visuals from outside the Jharkhand Assembly, where JPSC-JSSC aspirants are protesting.
They are demanding a full, independent CBI investigation into the JSSC-CGL exam and broader reforms for both JPSC and JSSC. pic.twitter.com/ZJ2aapeK3U
— ANI (@ANI) August 10, 2026
લાઠીચાર્જ બાદ ટીયર ગેસના ગોળા છોડાયા, વિદ્યાર્થીઓએ ગાયું રાષ્ટ્રગાન
વિધાનસભા તરફ આગળ વધી રહેલા વિદ્યાર્થીઓ પર પોલીસે ભીડ વિખેરવા માટે વોટર કેનન, લાઠીચાર્જ અને ટીયર ગેસના ગોળા છોડ્યા હતા. જોકે, પોલીસની કડક કાર્યવાહી વચ્ચે પણ વિદ્યાર્થીઓ પાછા હટ્યા નહોતા અને બધા એકઠા થઈને દેશનું રાષ્ટ્રગાન ગાવા લાગ્યા હતા. આ અનોખા વિરોધથી સમગ્ર વિસ્તારમાં નાસભાગ અને ભારે ઉત્તેજનાનો માહોલ સર્જાયો હતો.
વિદ્યાર્થીઓની મુખ્ય માંગણીઓ શું છે?
-
JSSC-CGL ની CBI તપાસ: JSSC-CGL પરીક્ષામાં થયેલી ગેરરીતિઓની તપાસ સેન્ટ્રલ બ્યુરો ઓફ ઈન્વેસ્ટિગેશન (CBI) દ્વારા કરાવાય.
-
પરીક્ષાઓ રદ કરવી: કૌભાંડગ્રસ્ત ગણાવાતી JSSC-CGL, 14મી JPSC અને ACF પરીક્ષાઓ સંપૂર્ણપણે રદ કરવામાં આવે.
-
સિસ્ટમમાં સુધારો: ભવિષ્યમાં પેપર લીક ન થાય તે માટે આખી પરીક્ષા સિસ્ટમમાં ધરમૂળથી સુધારા કરવા અને કડક રિક્રુટમેન્ટ કેલેન્ડર લાગુ કરવું.
JPSC કૌભાંડ: CID એ પૂર્વ પ્રમુખ L. Khiangte ની કરી ધરપકડ
બીજી તરફ, આ આંદોલન વચ્ચે ઝારખંડ લોકસેવા આયોગ (JPSC) સિવિલ સેવા પરીક્ષા ગેરરીતિ કેસમાં CID એ JPSCના પૂર્વ અધ્યક્ષ અને રાજ્યના પૂર્વ મુખ્ય સચિવ L. Khiangte ની સત્તાવાર ધરપકડ કરી લીધી છે. તપાસમાં સહયોગ આપવા માટે તેમણે અગાઉ રાજીનામું આપ્યું હતું.
મુખ્યમંત્રી આવાસ બહારથી બાબુલાલ મરાંડી અને ભાજપ નેતાઓની અટકાયત
વિદ્યાર્થીઓના સમર્થનમાં અને વિરોધ નોંધાવવા મુખ્યમંત્રી આવાસ બહાર ધરણાં પર બેસેલા ભાજપના પ્રદેશ પ્રમુખ બાબુલાલ મરાંડી, આદિત્ય સાહૂ સહિત વરિષ્ઠ નેતાઓની પોલીસે અટકાયત કરી તેમને કેમ્પ જેલમાં મોકલી આપ્યા હતા.
-
ભાજપનો આરોપ: ભાજપ નેતાઓએ કહ્યું કે, “ઝારખંડના યુવાનો પર અત્યાચાર થઈ રહ્યો છે અને સરકાર તાનાશાહી ચલાવી રહી છે.”
-
સરકારનો પક્ષ: ઝારખંડ સરકારના મંત્રીઓએ આરોપ લગાવ્યો છે કે ભાજપ વિદ્યાર્થીઓના આંદોલનને હાઈજેક કરવાનો પ્રયાસ કરી રહી છે અને સરકારે હાઈલેવલ સમિતિ બનાવીને મોટા ભાગની માંગણીઓ સ્વીકારી લીધી છે.
