ગુજરાત વિધાનસભામાં ‘સમાન નાગરિક સંહિતા’ (UCC) બિલ-2026 પસાર થયા બાદ રાજ્યના વિવિધ ભાગોમાં તેનો વિરોધ શરૂ થયો છે. પંચમહાલ જિલ્લાના શહેરામાં શુક્રવારે જુમ્માની નમાઝ બાદ મુસ્લિમ સમાજ દ્વારા આ કાયદા સામે શાંતિપૂર્ણ વિરોધ પ્રદર્શન કરવામાં આવ્યું હતું.
નમાઝ બાદ કાળી પટ્ટી બાંધી વિરોધ
શહેરામાં મુસ્લિમ સમાજના યુવાનો અને આગેવાનોએ જુમ્માની નમાઝ દરમિયાન પોતાના હાથ પર કાળી પટ્ટી બાંધી હતી. મુસ્લિમ સમુદાયની માગ છે કે આ કાયદાને પાછો ખેંચવામાં આવે અથવા તેમાંથી મુસ્લિમ સમાજને મુક્તિ આપવામાં આવે. વિરોધ કરી રહેલા લોકોનું કહેવું છે કે આ કાયદો તેમના ધાર્મિક અને વ્યક્તિગત અધિકારો પર અસર કરી શકે છે.
ગુજરાત UCC બિલ પસાર કરનાર બીજું રાજ્ય
નોંધનીય છે કે, 24 માર્ચ 2026ના રોજ ગુજરાત વિધાનસભામાં સાડા સાત કલાકની લાંબી ચર્ચા બાદ UCC બિલ બહુમતીથી પસાર કરવામાં આવ્યું હતું. ઉત્તરાખંડ બાદ ગુજરાત દેશનું બીજું એવું રાજ્ય બન્યું છે જેણે આ પ્રકારનું બિલ પસાર કર્યું હોય.
વિપક્ષનો આક્ષેપ અને વોક આઉટ
જ્યારે આ બિલ વિધાનસભામાં રજૂ કરવામાં આવ્યું ત્યારે કોંગ્રેસે તેનો ઉગ્ર વિરોધ કર્યો હતો. વિપક્ષનો આરોપ છે કે આગામી ચૂંટણીઓને ધ્યાનમાં રાખીને સરકાર ઉતાવળે આ બિલ લાવી છે. મતદાન સમયે કોંગ્રેસના ધારાસભ્યોએ ગૃહમાંથી વોક આઉટ પણ કર્યો હતો.
