ઇંગ્લેન્ડની પૂર્વ મહિલા ક્રિકેટર કેટ ક્રોસ (Kate Cross) મોટી મુશ્કેલીમાં મુકાઈ ગઈ છે. ICC womens T20 વર્લ્ડ કપ 2026 ના સેમીફાઇનલ શેડ્યૂલ પર સવાલ ઉઠાવવો તેને ભારે પડ્યો છે. સોશિયલ મીડિયા પર તેને જાનથી મારી નાખવાની ધમકીઓ મળી રહી છે.
કેટ ક્રોસે જણાવ્યું કે તેણે માત્ર ટૂર્નામેન્ટના આયોજન અંગે પોતાનો અભિપ્રાય આપ્યો હતો. પરંતુ લોકોએ તેની વાતનો ખોટો અર્થ કાઢ્યો. આ પછી તેને ઓનલાઇન ટ્રોલિંગ અને ધમકીઓનો સામનો કરવો પડ્યો છે.
પોડકાસ્ટમાં કર્યો મોટો ખુલાસો
કેટ ક્રોસે તેની સાથી પૂર્વ ક્રિકેટર એલેક્સ હાર્ટલી (Alex Hartley) સાથે મળીને આ વાતનો ખુલાસો કર્યો છે. તેઓ બંને ‘નો બોલ્સ: ધ ક્રિકેટ પોડકાસ્ટ’ (No Balls: The Cricket Podcast) ચલાવે છે.
એલેક્સ હાર્ટલીએ જણાવ્યું કે બંનેને સોશિયલ મીડિયા પર સતત અપશબ્દો અને ધમકીભર્યા મેસેજ મળી રહ્યા છે. કેટ ક્રોસે કહ્યું:
“જ્યારે મેં સવારે મારું ઇન્સ્ટાગ્રામ જોયું, તો એક જ પોસ્ટ પર 450 થી વધુ કમેન્ટ્સ હતી. સામાન્ય રીતે મારી પોસ્ટ પર માત્ર 30 જેટલી કમેન્ટ્સ આવે છે. લોકોએ મારી વાતને ખોટા સંદર્ભમાં લીધી છે.”
શું હતો શેડ્યૂલનો સમગ્ર વિવાદ?
આ સમગ્ર વિવાદ T20 વર્લ્ડ કપ 2026 ના સેમીફાઇનલના નિયમોને કારણે શરૂ થયો હતો. ટૂર્નામેન્ટના નિયમ મુજબ, જો ભારતીય ટીમ સેમીફાઇનલમાં પહોંચે, તો તેણે 30 જૂને પહેલી સેમીફાઇનલ રમવાની હતી. જ્યારે સામાન્ય નિયમ મુજબ, ગ્રુપ-એ ની ટોચની ટીમે ગ્રુપ-બી ની બીજા નંબરની ટીમ સામે 2 જુલાઈએ રમવાનું હતું.
આ ખાસ નિયમ પર જ કેટ ક્રોસ અને એલેક્સ હાર્ટલીએ સવાલ ઉઠાવ્યા હતા.
ICC એ શું આપી સ્પષ્ટતા?
વિવાદ વધતા એલેક્સ હાર્ટલીએ આ અંગે સીધી ICC (International Cricket Council) સાથે વાત કરી હતી. ICC એ સ્પષ્ટતા કરી છે કે:
-
આ નિયમ કોઈ એક ટીમ કે ભારતને ફાયદો કરાવવા માટે નથી બનાવ્યો.
-
સેમીફાઇનલનો સમય બ્રિટન અને દુનિયાભરના દર્શકોની સંખ્યાને ધ્યાનમાં રાખીને નક્કી કરાયો હતો.
કેટ ક્રોસે ટ્રોલર્સને આપ્યો જડબાતોડ જવાબ
ICC ની સ્પષ્ટતા બાદ હવે સ્થિતિ સાફ થઈ ગઈ છે. કેટ ક્રોસે કહ્યું કે તેનો હેતુ ભારત કે ભારતીય ક્રિકેટ ટીમની ટીકા કરવાનો ક્યારેય નહોતો. તેનું માનવું છે કે કોઈ પણ મોટી ટૂર્નામેન્ટનું શેડ્યૂલ કોઈ એક ટીમના ક્વોલિફિકેશનને આધારે ન બનવું જોઈએ.
તેણે સોશિયલ મીડિયા યુઝર્સને સલાહ આપી કે અસહમતી હોવી સામાન્ય બાબત છે, પરંતુ ભાષાની મર્યાદા જળવાવી જોઈએ. અંતમાં તેણે અપીલ કરી કે લોકોએ કોઈના પણ નિવેદનને તોડી-મરોડીને રજૂ ન કરવું જોઈએ.
< /p>
