કર્ણાટકની રાજધાની બેંગલુરુમાં રવિવારે રાત્રે માત્ર થોડા જ કલાકોના અંતરે હત્યાના બે અલગ-અલગ કિસ્સાઓ સામે આવતા સમગ્ર વિસ્તારમાં ચકચાર મચી ગઈ છે. પ્રથમ ઘટનામાં લગ્નના વિવાદમાં પ્રેમીએ પ્રેમિકા ની હત્યા કરી છે, જ્યારે બીજી ઘટનામાં ભાડાના મકાનમાંથી એક મહિલાની લાશ મળી આવી છે.
ગુનાહિત ઇતિહાસ ધરાવતા પ્રેમીએ કરી પ્રેમિકાની ક્રૂર હત્યા
બેંગલુરુના મહાલક્ષ્મી લેઆઉટ વિસ્તારમાં 23 વર્ષીય અંજલિ નામની યુવતીની તેના જ બોયફ્રેન્ડ રાજીવે ચપ્પુના ઘા મારીને નિર્મમ હત્યા કરી દીધી છે.
-
અંજલિ અને રાજીવ છેલ્લા ત્રણ વર્ષથી વધુ સમયથી રિલેશનશિપમાં હતા.
-
રાજીવ ગુનાહિત બેકગ્રાઉન્ડ ધરાવતો હોવાથી અંજલિના પરિવારજનો આ લગ્નની વિરુદ્ધમાં હતા.
-
રવિવારે રાત્રે લગ્નની બાબતે બંને વચ્ચે ઉગ્ર બોલાચાલી થઈ હતી, જે બાદ રાજીવે આ હિચકારો હુમલો કર્યો હતો.
-
ઘટનાના થોડા જ સમયમાં પોલીસે ત્વરિત કાર્યવાહી કરીને આરોપી રાજીવની ધરપકડ કરી લીધી છે.
ભાડાના રૂમમાંથી મહિલાની લાશ મળી
બીજી એક ઘટનામાં, ઉત્તર ભારતની વતની એવી 40 વર્ષીય કૃષ્ણા બર્મન નામની મહિલાની લાશ બોમ્મનહલ્લી પોલીસ સ્ટેશન વિસ્તારના હોંગાસંદ્રા સ્થિત એક ભાડાના ઓરડામાંથી મળી આવી છે. પોલીસને પ્રાથમિક દ્રષ્ટિએ શંકા છે કે કોઈ પરિચિત વ્યક્તિએ જ ગળું દબાવીને મહિલાની હત્યા કરી છે. હાલ પોલીસ આ મામલે સઘન તપાસ ચલાવી રહી છે.
કારમાં બ્લાસ્ટ થતાં યુવકનું મોત
અન્ય એક કિસ્સામાં, કર્ણાટકના તુમકુરુ જિલ્લામાં નેશનલ હાઈવે પર એક ચાલુ કારમાં બ્લાસ્ટ થતાં નાગેન્દ્ર (30) નામના યુવકનું બળી જવાથી મોત નીપજ્યું છે. પોલીસને શંકા છે કે કારમાં આગ લગાડવા માટે દેશી બોમ્બનો ઉપયોગ કરવામાં આવ્યો હતો. આ બ્લાસ્ટ પહેલા નાગેન્દ્રએ કારની અંદર એક મહિલા પર ચપ્પુથી હુમલો કર્યો હતો, પરંતુ મહિલા અને કાર ચાલક સમયસર બહાર કૂદી જતાં તેમનો જીવ બચી ગયો હતો.
