અમદાવાદની શાળાઓમાં અભ્યાસ કરતા સગીર વિદ્યાર્થીઓની સુરક્ષાને લઈને મોટા સમાચાર સામે આવ્યા છે. અમદાવાદ જિલ્લા શિક્ષણ અધિકારી (DEO) દ્વારા એક કડક પરિપત્ર જાહેર કરવામાં આવ્યો છે. હવેથી ડ્રાઇવિંગ લાયસન્સ અને હેલ્મેટ વિના વાહન લઈને આવતા વિદ્યાર્થીઓને શાળા પરિસરમાં પ્રવેશ મળશે નહીં.
DEO પરિપત્રની મુખ્ય બાબતો
-
નો-એન્ટ્રી: 18 વર્ષથી ઓછી વયના અથવા લાયસન્સ વિનાના વિદ્યાર્થીઓને વાહન સાથે શાળામાં પ્રવેશ નહીં મળે.
-
હેલ્મેટ ફરજિયાત: ટુ-વ્હીલર લઈને આવતા વિદ્યાર્થીઓ માટે હેલ્મેટ પહેરવું ફરજિયાત છે.
-
વાલીઓ સામે કાર્યવાહી: નિયમનું ઉલ્લંઘન કરનાર વિદ્યાર્થીઓના વાલીઓને તાત્કાલિક શાળાએ બોલાવવામાં આવશે.
-
લેખિત ખાતરી: ભવિષ્યમાં આવું ન થાય તે માટે વાલીઓ પાસેથી લેખિત બાંહેધરી લેવાશે.
7 દિવસમાં જાગૃતિ કાર્યક્રમો યોજવા આદેશ
DEO એ તમામ શાળાઓને આગામી 7 દિવસમાં રોડ સેફ્ટી અને ટ્રાફિક જાગૃતિના કાર્યક્રમો યોજવા સૂચના આપી છે.
-
પ્રાર્થના સભા અને વર્ગખંડમાં વિદ્યાર્થીઓને ટ્રાફિક નિયમો સમજાવવામાં આવશે.
-
RTO અધિકારીઓ અને રોડ સેફ્ટી નિષ્ણાતોને શાળામાં આમંત્રિત કરવામાં આવશે.
-
વાલીઓને વોટ્સએપ, SMS કે લેખિત પત્ર દ્વારા નિયમો વિશે જાણ કરવામાં આવશે.
શાળાઓમાં થશે સરપ્રાઇઝ ચેકિંગ
DEO એ સ્પષ્ટ ચેતવણી આપી છે કે માત્ર કાગળ પર નિયમો નહીં ચાલે. DEO ની ટીમ, ટ્રાફિક પોલીસ અને RTO અધિકારીઓ સાથે મળીને શાળાઓમાં સરપ્રાઇઝ ચેકિંગ કરશે.
જો શાળા પરિસરમાં લાયસન્સ વગરના વિદ્યાર્થીઓના વાહનો જોવા મળશે, તો જવાબદાર શાળા સામે પણ કાયદેસરની કાર્યવાહી કરવામાં આવશે.
DEO નો વાલીઓને સંદેશ: “ટ્યુશન કે કોચિંગ ક્લાસ જવા માટે સમય બચાવવાના બહાને બાળકોને વાહન આપવું કાયદા વિરુદ્ધ અને જોખમી છે. કોઈ હોનારત બને તે પછી પસ્તાવો કરવા કરતાં પહેલાંથી જ ટ્રાફિક નિયમોનું પાલન કરવું જરૂરી છે.”
મોટર વાહન અધિનિયમ, 1988 હેઠળ કાનૂની જોગવાઈઓ
જો સગીર વયના બાળકો વાહન ચલાવતા પકડાશે તો કાયદા મુજબ કડક પગલાં લેવાશે:
-
કલમ 3: માન્ય ડ્રાઇવિંગ લાયસન્સ વગર વાહન ચલાવવું ગેરકાયદેસર છે.
-
કલમ 4: નિર્ધારિત વય મર્યાદા (18 વર્ષ) પહેલાં વાહન ચલાવી શકાય નહીં.
-
કલમ 181: લાયસન્સ વગર વાહન ચલાવવા બદલ ભારે દંડ.
-
કલમ 199A: સગીર વાહન ચલાવે તો વાહનના માલિક કે વાલી સામે ગુનો નોંધાશે અને દંડાત્મક કાર્યવાહી થશે.
