અમેરિકા અને ઈરાન વચ્ચે લશ્કરી તણાવ સતત વધી રહ્યો છે. આ દરમિયાન અમેરિકી રાષ્ટ્રપતિ ડોનાલ્ડ ટ્રમ્પે એક મોટો દાવો કર્યો છે. ટ્રમ્પના જણાવ્યા અનુસાર, ઈરાનનું ટોચનું સૈન્ય નેતૃત્વ સંપૂર્ણપણે ખતમ થઈ ગયું છે. તેમણે દાવો કર્યો કે ઈરાનના વર્તમાન સુપ્રીમ લીડર મૌલાના અયાતુલ્લા અલી ખામેનેઈના પુત્ર મોજ્તબા ખામેનેઈ આશરે ૯૦ ટકા ખતમ થઈ ગયા છે. બંને દેશો વચ્ચે મિસાઈલ હુમલા અને જવાબી કાર્યવાહી તેજ થતાં આ નિવેદન સામે આવ્યું છે.
‘ઈરાનની સંરક્ષણ વ્યવસ્થા સંપૂર્ણપણે તબાહ’
ફોક્સ ન્યૂઝને આપેલા ઈન્ટરવ્યુમાં ડોનાલ્ડ ટ્રમ્પે ગંભીર વાતો કહી છે. તેમણે જણાવ્યું કે અમેરિકા અને ઈઝરાયેલની સંયુક્ત સૈન્ય કાર્યવાહીએ ઈરાનને નબળું પાડી દીધું છે.
ટ્રમ્પે કહ્યું, “ઈરાન પાસે હવે કોઈ નેવી કે એરફોર્સ બચી નથી. બધું જ ખતમ થઈ ગયું છે. તેમનું એન્ટી-એરક્રાફ્ટ સિસ્ટમ પણ નાશ પામ્યું છે. તેમના તમામ મોટા નેતાઓ માર્યા ગયા છે.” અહેવાલો અનુસાર, મોજ્તબા ખામેનેઈ અગાઉના એક હવાઈ હુમલામાં ગંભીર રીતે ઘાયલ થયા હતા. તેઓ તાજેતરમાં ઈરાન અને ઈરાકમાં યોજાયેલા મોટા કાર્યક્રમોમાં પણ જોવા મળ્યા નહોતા.
‘સ્ટ્રેટ ઓફ હોર્મુઝ’ પર અમેરિકાની કડકાઈ
આ દરિયાઈ વિસ્તાર હવે બંને દેશો વચ્ચેના વિવાદનું મુખ્ય કેન્દ્ર બન્યો છે. અમેરિકાએ ઈરાન પર ફરીથી દરિયાઈ નાકેબંધી લાગુ કરવાની જાહેરાત કરી છે.
ટ્રમ્પે સોશિયલ મીડિયા પ્લેટફોર્મ ‘ટ્રુથ સોશિયલ’ પર લખ્યું કે, અમેરિકી સેના હવે ‘સ્ટ્રેટ ઓફ હોર્મુઝની ગાર્ડિયન’ બનશે. ઈરાન ઈચ્છે કે ના ઈચ્છે, આ દરિયાઈ માર્ગ ખુલ્લો જ રહેશે. અમે ઈરાનના જહાજો અને તેના ગ્રાહકોને રોકીશું. બાકીના તમામ દેશો આ જલમાર્ગનો ઉપયોગ કરી શકશે.
જહાજો પર 20 ટકા ટેક્સ લગાવવાની તૈયારી
ડોનાલ્ડ ટ્રમ્પે એક નવો પ્રસ્તાવ પણ મૂક્યો છે. આ સમુદ્રી માર્ગનો ઉપયોગ કરનારા દેશોએ સુરક્ષા વ્યવસ્થા માટે અમેરિકાને મદદ કરવી પડશે.
અમેરિકા આ માર્ગ પરથી પસાર થતા માલસામાન પર ૨૦ ટકા સુરક્ષા શુલ્ક (ટેક્સ) લગાવવાની તૈયારી કરી રહ્યું છે. અમેરિકાનું કહેવું છે કે આ રકમ સુરક્ષા અભિયાન અને જહાજોની સલામતી પાછળ ખર્ચવામાં આવશે.
ઈરાને ટ્રમ્પના દાવાને ફગાવ્યો
અમેરિકાની આ જાહેરાત બાદ ઈરાને આકરી પ્રતિક્રિયા આપી છે. ઈરાનના વિદેશ મંત્રી અબ્બાસ અરાગચીએ કહ્યું કે હોર્મુઝની સુરક્ષાની જવાબદારી અમેરિકાની નથી. આ જવાબદારી ઐતિહાસિક અને કાનૂની રીતે માત્ર ઈરાનની છે.
તેમણે સોશિયલ મીડિયા પર કટાક્ષ કરતા લખ્યું કે, ૨૦ ટકા શુલ્ક ખૂબ વધારે છે, અમે આ અંગે યોગ્ય વ્યવસ્થા કરીશું. સ્ટ્રેટ ઓફ હોર્મુઝ દુનિયાનો સૌથી મહત્વપૂર્ણ દરિયાઈ માર્ગ છે. અહીંથી વિશ્વના મોટાભાગના તેલ અને ગેસનો પુરવઠો પુરો પાડવામાં આવે છે. આ સ્થિતિમાં બંને દેશો વચ્ચેનો ટકરાવ વૈશ્વિક ઉર્જા સુરક્ષા માટે ચિંતાનો વિષય બન્યો છે.
