અમદાવાદમાં ડેટિંગ એપના માધ્યમથી પોતાને ક્રાઇમ બ્રાન્ચનો સાયબર ઓફિસર ઓળખાવી, એક યુવતીને લગ્નની જાળમાં ફસાવી હજારો રૂપિયા પડાવી લીધાની ચોંકાવનારી ઘટના સામે આવી છે.
બમ્બલ એપ પર ‘રોકી પંચાલ’ તરીકે મુલાકાત થઈ
મૂળ રાજકોટની અને હાલ અમદાવાદના નવરંગપુરામાં રહેતી 35 વર્ષીય યુવતી ખાનગી ઇન્સ્યોરન્સ કંપનીમાં મેનેજર છે. તે લગ્ન માટે યોગ્ય પાત્રની શોધમાં હતી. આ માટે તેણે ‘બમ્બલ’ (Bumble) ડેટિંગ એપ પર એકાઉન્ટ બનાવ્યું હતું. ત્યાં તેની મુલાકાત રોકી પંચાલ નામના યુવક સાથે થઈ હતી.
યુવકે ઇન્સ્ટાગ્રામ પર પોલીસની વર્દીવાળા ફોટા મૂક્યા હતા. તેના બાયોમાં ‘ક્રાઇમ બ્રાન્ચ સાયબર સિક્યોરિટી ઓફિસર’ લખ્યું હતું. સરકારી નોકરી અને પોલીસ અધિકારી જોઈને યુવતી તેના સંપર્કમાં આવી હતી.
રડવાનું નાટક કરીને ₹79,700 પડાવ્યા
બંને વચ્ચે લગ્નની વાતો શરૂ થયા બાદ, 16 મેના રોજ તેઓ રૂબરૂ મળ્યા હતા. મુલાકાત દરમિયાન યુવકે સેટેલાઇટ વિસ્તારમાં પોતાના મકાનનું કામ ચાલતું હોવાનું કહ્યું હતું. તેણે રડવાનું નાટક કરીને કોન્ટ્રાક્ટરને તાત્કાલિક પૈસા ચૂકવવાના બહાને આર્થિક મદદ માંગી હતી.
યુવતીએ તેની વાતો પર ભરોસો કરીને 17 મેના રોજ ગૂગલ પે (Google Pay) દ્વારા ₹79,700 ટ્રાન્સફર કરી દીધા હતા.
વધુ પૈસા અને દસ્તાવેજો માંગતા ભાંડો ફૂટ્યો
આટલા રૂપિયા મેળવ્યા બાદ નકલી PSIની લાલચ વધી ગઈ હતી. તેણે એ જ રાત્રે નવો મોબાઈલ ખરીદવાના બહાને વધુ ₹60,000 તેમજ યુવતીના સરકારી ઓળખપત્રો [ઓળખપત્ર દસ્તાવેજો રેડેક્ટેડ] અને પાનકાર્ડ માંગ્યા હતા.
અચાનક જ પૈસા અને અંગત દસ્તાવેજોની માંગણી થતાં યુવતીને શંકા ગઈ હતી. તેણે ખાનગીમાં તપાસ કરાવી તો ચોંકાવનારી વિગતો સામે આવી હતી.
તપાસમાં સામે આવ્યું કે રોકી પંચાલનું સાચું નામ હિમાંશુ પંચાલ છે. તે પોલીસ વિભાગમાં નોકરી કરતો નથી અને માત્ર ઠગાઈ કરવા માટે નકલી ઓફિસર બન્યો હતો.
નવરંગપુરા પોલીસ સ્ટેશનમાં ફરિયાદ નોંધી
પોતાની સાથે લગ્નના નામે છેતરપિંડી થઈ હોવાનું સમજાતાં જ યુવતીએ તાત્કાલિક નવરંગપુરા પોલીસ સ્ટેશનમાં ફરિયાદ નોંધાવી છે. પોલીસે ગુનો નોંધી આરોપીની ધરપકડ કરવા ચક્રો ગતિમાન કર્યા છે.
