ભારતમાં બુલેટ ટ્રેનનું સપનું હવે ધીમે-ધીમે હકીકત બની રહ્યું છે. ભારતીય રેલ્વેએ દેશની પ્રથમ બુલેટ ટ્રેનની ડિઝાઇન સત્તાવાર રીતે જાહેર કરી દીધી છે. નવી દિલ્હી સ્થિત રેલ્વે મંત્રાલયના ગેટ નંબર-૪ પર આ ટ્રેનની તસવીર લગાવવામાં આવી છે, જેણે લોકોમાં ભારે ઉત્સાહ વધાર્યો છે. આ બુલેટ ટ્રેન મુંબઈ-અમદાવાદ હાઈ સ્પીડ રેલ કોરિડોર પર દોડશે. આધુનિક ડિઝાઇન, તેજ રફતાર અને અત્યાધુનિક ટેકનોલોજીથી સજ્જ આ ટ્રેન ભારતમાં મુસાફરીનો આખો નકશો બદલી નાખશે.
મુંબઈથી અમદાવાદ વચ્ચે દોડશે બુલેટ ટ્રેન
૫૦૮ કિલોમીટર લાંબો મુંબઈ-અમદાવાદ હાઈ સ્પીડ રેલ પ્રોજેક્ટ ભારતનો પ્રથમ બુલેટ ટ્રેન પ્રોજેક્ટ છે. આ ટ્રેન મહારાષ્ટ્ર, ગુજરાત અને દાદરા તથા નગર હવેલીમાંથી પસાર થશે. આ રૂટ પર કુલ ૧૨ સ્ટેશન બનાવવામાં આવશે, જેમાં મુંબઈ, થાણે, વિરાર, બોઈસર, વાપી, બિલીમોરા, સુરત, ભરૂચ, વડોદરા, આણંદ, અમદાવાદ અને સાબરમતીનો સમાવેશ થાય છે.
ગુજરાતમાં સ્ટેશનોનું કામ ઝડપથી ચાલુ
રેલ્વેના જણાવ્યા અનુસાર, ગુજરાતના ૮ સ્ટેશનો પર ફાઉન્ડેશન (પાયા) નું કામ પૂર્ણ થઈ ચૂક્યું છે. બીજી તરફ મહારાષ્ટ્રના થાણે, વિરાર અને બોઈસરમાં પણ કામ ઝડપથી ચાલી રહ્યું છે. મુંબઈના બાંદ્રા-કુર્લા કોમ્પ્લેક્સ (BKC) સ્ટેશન પર ખોદકામનું કામ લગભગ પૂરું થઈ ગયું છે. આ સિવાય દરિયાની નીચે બનનારી ટનલનું કામ પણ તેજીથી આગળ વધી રહ્યું છે.
૨૮૦ કિમી પ્રતિ કલાકની હશે સ્પીડ
આ હાઈ-સ્પીડ ટ્રેનને ‘મેક ઈન ઈન્ડિયા’ (Make in India) પહેલ હેઠળ તૈયાર કરવામાં આવી રહી છે. ચેન્નાઈની ઈન્ટિગ્રલ કોચ ફેક્ટરી (ICF) અને બેંગલુરુની BEML સાથે મળીને આ ટ્રેન સેટ વિકસાવી રહી છે. રેલ્વેના જણાવ્યા મુજબ, આ ટ્રેનની ડિઝાઇન સ્પીડ આશરે ૨૮૦ કિલોમીટર પ્રતિ કલાકની હશે. આનાથી મુંબઈ અને અમદાવાદ વચ્ચેનું અંતર માત્ર ગણતરીના કલાકોમાં કપાઈ જશે.
જાપાની ટેકનોલોજી અને ભારતીય ડિઝાઇનનું મિશ્રણ
આ બુલેટ ટ્રેન પ્રોજેક્ટ જાપાનની હાઈ-સ્પીડ રેલ ટેકનોલોજીની મદદથી વિકસાવવામાં આવી રહ્યો છે. જો કે, તેને ભારતના વાતાવરણ અને જરૂરિયાતોને ધ્યાનમાં રાખીને ખાસ રીતે ડિઝાઇન કરવામાં આવી છે. રેલ્વેનું કહેવું છે કે સુરક્ષા અને આરામની બાબતમાં આ ટ્રેન વિશ્વસ્તરીય સુવિધાઓથી સજ્જ હશે. તેનાથી દેશમાં વેપાર-રોજગારને વેગ મળશે અને હાઈ-સ્પીડ રેલ ટેકનોલોજીમાં ભારતની નવી ઓળખ બનશે.
