અમદાવાદ: શહેરમાં ગરમીનો પારો વધતા હવે વાહનોમાં આગ લાગવાની ઘટનાઓ સામે આવી રહી છે. આજે શનિવારે શહેરના વ્યસ્ત ગણાતા આનંદનગર રોડ પર એક ચાલુ બાઇક માં અચાનક આગ લાગતા ભયનો માહોલ સર્જાયો હતો.
ચાલુ બાઇક બની ગયું આગનો ગોળો
આ ઘટના આનંદનગર વિસ્તારની કોમ્ફી હોટલ પાસે બની હતી. એક યુવક પોતાનું બાઇક લઈને પસાર થઈ રહ્યો હતો, ત્યારે અચાનક એન્જિનમાંથી ધુમાડા નીકળવા લાગ્યા હતા. જોતજોતામાં આગ એટલી વિકરાળ બની કે આખું બાઇક આગની લપેટમાં આવી ગયું હતું.
ચાલકનો ચમત્કારિક બચાવ
સદનસીબે, બાઇક સવારે સમયસૂચકતા વાપરી હતી. આગ લાગતા જ તે તરત બાઇક પરથી નીચે ઉતરી ગયો હતો. જેના કારણે તેનો જીવ બચી ગયો હતો. ઘટનાને પગલે રસ્તા પર લોકોના ટોળા ઉમટી પડ્યા હતા અને થોડીવાર માટે ટ્રાફિક જામ પણ થયો હતો.
ફાયર બ્રિગેડે આગ પર મેળવ્યો કાબૂ
ઘટનાની જાણ થતા જ ફાયર બ્રિગેડની ટીમ ઘટનાસ્થળે પહોંચી ગઈ હતી. પાણીનો મારો ચલાવીને આગને બુઝાવવામાં આવી હતી. જોકે, ત્યાં સુધીમાં બાઇક બળીને ખાખ થઈ ગયું હતું.
આગ લાગવાનું કારણ શું?
પ્રાથમિક તપાસ મુજબ, અમદાવાદમાં ગરમીનો પારો 42 ડિગ્રીની આસપાસ છે. પ્રચંડ ગરમીના કારણે એન્જિન ઓવરહીટ થવાથી અથવા વાયરિંગમાં શોર્ટ સર્કિટના કારણે આ આગ લાગી હોવાનું મનાય છે. પ્રાથમિક દ્રષ્ટિએ આ આગ ટેકનિકલ ખામી અથવા તો પ્રચંડ ગરમીના કારણે એન્જિન ઓવરહીટ થવાથી લાગી હોવાનું મનાઈ રહ્યું છે. ઉલ્લેખનીય છે કે, અમદાવાદમાં ગરમીનો પારો 40-42 ડિગ્રીને પાર કરી રહ્યો છે, ત્યારે વાહનોમાં ઇંધણની લાઈન કે વાયરિંગમાં ખામી હોવાને કારણે આગની ઘટનાઓ બની શકે છે. પોલીસ અને ફાયર વિભાગે વાહનચાલકોને અપીલ કરી છે કે ઉનાળાની ઋતુમાં વાહનોનું નિયમિત સર્વિસિંગ કરાવવું અને વાયરિંગમાં કોઈ પણ પ્રકારના ફેરફાર કરાવવાનું ટાળવું જોઈએ.
વાહનચાલકો માટે સાવચેતીની ટિપ્સ:
-
ઉનાળામાં વાહનનું નિયમિત સર્વિસિંગ કરાવો.
-
વાયરિંગમાં બહારથી કોઈ ફેરફાર (Modification) ન કરાવવો.
-
ફ્યુઅલ પાઈપમાં લીકેજ હોય તો તરત જ રિપેર કરાવો.
