જુમ્મા ચુમ્મા ગર્લ’ કિમી કાટકર હવે ક્યાં છે? બોલિવૂડ છોડીને જીવે છે આવું જીવન

બોલિવૂડમાં 80 અને 90ના દાયકામાં પોતાની બોલ્ડનેસથી સન્સશેન મચાવનારી એક્ટ્રેસ કિમી કાટકરને આજે પણ લોકો ‘જુમ્મા ચુમ્મા ગર્લ’ તરીકે ઓળખે છે. તે પોતાના સમયની એક ટોચની અભિનેત્રી હતી. તેણે અમિતાભ બચ્ચન, ગોવિંદા, રજનીકાંત અને ધર્મેન્દ્ર જેવા તે સમયના તમામ મોટા સ્ટાર્સ સાથે કામ કર્યું હતું.

પરંતુ વર્ષ 1992માં અચાનક તેણે એક્ટિંગ છોડી દીધી અને લાઈમલાઈટથી દૂર થઈ ગઈ. આજે તે એક દાદી બની ચૂકી છે અને ખૂબ જ શાંતિભર્યું જીવન જીવી રહી છે.

બોલ્ડ સીન આપીને રાતોરાત મળી હતી પ્રખ્યાતિ

કિમી કાટકર નો જન્મ 11 ડિસેમ્બર 1965ના રોજ થયો હતો. તેણે માત્ર 20 વર્ષની ઉંમરે ફિલ્મોમાં કામ કરવાનું શરૂ કર્યું હતું.

• કરિયરની શરૂઆત: તેણે વર્ષ 1985માં ‘પત્થર દિલ’ ફિલ્મથી ડેબ્યુ કર્યું હતું, પણ તેમાં સાઇડ રોલ હોવાથી તેને ઓળખ ન મળી.

• ટાર્ઝન ગર્લનું ટાઇટલ: વર્ષ 1985માં જ આવેલી ફિલ્મ ‘એડવેન્ચર્સ ઓફ ટાર્ઝન’માં આપેલા બોલ્ડ સીન્સ અને બિકીની લુકને કારણે તે રાતોરાત ફેમસ થઈ ગઈ. આ ફિલ્મ ફ્લોપ રહી હોવા છતાં તેને ‘ઇન્ડિયન ટાર્ઝન ગર્લ’નું ટાઇટલ મળ્યું હતું.

• સૌથી બિઝી એક્ટ્રેસ: વર્ષ 1988થી 1990 દરમિયાન તેણે 35થી વધુ ફિલ્મોમાં કામ કર્યું હતું. વર્ષ 1989માં તેણે એકસાથે 15 ફિલ્મો કરી હતી, જે બોક્સ ઓફિસ પર હિટ સાબિત થઈ હતી.

લગ્ન બાદ બોલિવૂડને કહી દીધું અલવિદા

કિમી કાટકરને અસલી અને સૌથી મોટી સફળતા અમિતાભ બચ્ચન સાથેની ફિલ્મ ‘હમ’ (Hum) ના સુપરહિટ ગીત ‘જુમ્મા ચુમ્મા દે દે’થી મળી હતી. આ ગીતે તેને દેશભરમાં લોકપ્રિય બનાવી દીધી.

ત્યારબાદ કેટલીક ફિલ્મો ફ્લોપ ગયા પછી, તે છેલ્લે 1992માં આવેલી ફિલ્મ ‘હમલા’માં જોવા મળી હતી. આ ફિલ્મ પછી તેણે પ્રખ્યાત ફોટોગ્રાફર અને એડ નિર્માતા શાંતનુ શૌરી સાથે લગ્ન કરી લીધા અને ફિલ્મી દુનિયાથી કાયમ માટે અંતર બનાવી લીધું.

એક્ટિંગ છોડવાનું અસલી કારણ શું હતું?

વર્ષ 2025માં એક યુટ્યુબ ચેનલને આપેલા ઇન્ટરવ્યુમાં કિમી કાટકરે બોલિવૂડ છોડવાના પોતાના નિર્ણય પર મોટો ખુલાસો કર્યો હતો.

“તે સમયે પ્રોફેશનલ અને પર્સનલ લાઈફ વચ્ચે તાલમેલ બેસાડવો ખૂબ જ અઘરો હતો. તે જમાનામાં ઈન્ડસ્ટ્રીમાં એક્ટ્રેસે સિંગલ દેખાવું પડતું હતું, તમે કોઈને ડેટ નહોતા કરી શકતા. સ્ક્રીન પર જોઈને લોકોને લાગવું જોઈએ કે તમે બસ તેમના જ છો. મને અહેસાસ થયો કે જીવવા માટે એક જ જિંદગી મળી છે અને હું તેને પૂરી આઝાદીથી જીવવા માંગતી હતી. હું નાની ઉંમરે જ માતા બનવા માંગતી હતી.” – કિમી કાટકર

અત્યારે ક્યાં અને કેવું જીવન જીવે છે કિમી?

કિમી કાટકર હાલમાં મીડિયા અને રિયાલિટી શોની ચમક-દમકથી દૂર એક સાધારણ પ્રાઇવેટ લાઇફ જીવી રહી છે.

• પુણેથી ગોવા શિફ્ટ થઈ: લગ્ન બાદ તે ઘણા વર્ષો સુધી પતિ અને પુત્ર સાથે ઓસ્ટ્રેલિયામાં રહી હતી. ત્યારબાદ તે ભારત પરત આવીને પુત્રના અભ્યાસ માટે પુણેમાં રહેવા લાગી હતી.

• હવે ગોવામાં છે આશિયાનું: હાલમાં તે પોતાના પરિવાર સાથે ગોવામાં એક દાદી તરીકે સુખદ અને શાંતિપૂર્ણ જીવન વિતાવી રહી છે.

• બેકિંગનો શોખ: લાઈમલાઈટથી દૂર થયા બાદ તેણે પોતાની પસંદગીઓ પર ધ્યાન આપ્યું છે અને તે 6 મહિનાનો સ્પેશિયલ બેકિંગ કોર્સ પણ કરી ચૂકી છે.