ગુજરાત એન્ટી ટેરરિસ્ટ સ્ક્વોડ (ATS) અને બનાસકાંઠા એસઓજીએ એક સંયુક્ત ઓપરેશનમાં મોટી સફળતા મેળવી છે. પંજાબમાં ગ્રેનેડ સ્મગલિંગના ગુનામાં વોન્ટેડ અને પાકિસ્તાની ગેંગ સાથે સંકળાયેલા ખતરનાક આરોપીની ડીસા પાસેથી ધરપકડ કરવામાં આવી છે.
ડીસાના ઢાબા પરથી પાકિસ્તાની બિક્રમજીત ઝડપાયો
ગુપ્તચર એજન્સીઓને બાતમી મળી હતી કે પાકિસ્તાની ગેંગસ્ટર સહેજાદ ભટ્ટ ગેંગનો સાગરીત બિક્રમજીતસિંઘ ઉર્ફે વિક્કી બનાસકાંઠામાં છુપાયો છે. તે ડીસા હાઈવે પર આવેલા એક ઢાબામાં પોતાની ઓળખ છુપાવી મજૂર તરીકે કામ કરી રહ્યો હતો. એટીએસની ટીમે વોચ ગોઠવીને તેને દબોચી લીધો છે.
ISI સાથે સીધું કનેક્શન
તપાસમાં સામે આવ્યું છે કે આરોપી બિક્રમજીત પાકિસ્તાની ગુપ્તચર એજન્સી ISI સાથે જોડાયેલા નેટવર્ક માટે કામ કરતો હતો. તપાસમાં એ પણ સામે આવ્યું છે કે, આ આરોપી માત્ર સ્મગલિંગ જ નહીં પરંતુ સ્થાનિક યુવકોને પોતાની ગેંગમાં ભરતી કરવાનું કામ પણ કરતો હતો. તે યુવાનોને ગેરકાયદે પ્રવૃત્તિઓ અને દેશવિરોધી કૃત્યોમાં જોડવા માટે પ્રોત્સાહિત કરતો હતો, જે દેશની આંતરિક સુરક્ષા માટે ગંભીર ખતરો સાબિત થઈ શકે તેમ હતું.
-
તે પંજાબમાં ગ્રેનેડ હુમલા કરવાના કાવતરામાં મુખ્ય ભૂમિકા ભજવતો હતો.
-
તે પાકિસ્તાની આકાઓના ઈશારે ભારતમાં અસ્થિરતા ફેલાવવાનું કામ કરતો હતો.
-
તે સ્થાનિક યુવકોનું બ્રેઈનવોશિંગ કરી તેમને દેશવિરોધી પ્રવૃત્તિઓમાં જોડતો હતો.
પંજાબ પોલીસને સોંપાશે
ગુજરાત એટીએસ હાલ એ તપાસ કરી રહી છે કે ગુજરાતમાં તેના રોકાણ પાછળ અન્ય કોઈ મોટું કાવતરું હતું કે કેમ. પ્રાથમિક પૂછપરછ બાદ આરોપી બિક્રમજીતને આગળની કાર્યવાહી માટે પંજાબ પોલીસને સોંપવામાં આવશે. આ ધરપકડથી આંતરરાષ્ટ્રીય સ્મગલિંગ નેટવર્કને મોટો ફટકો પડ્યો છે.
