મેટાના CEO માર્ક ઝુકરબર્ગે CSAM કન્ટેન્ટ, ડીપફેક કન્ટેન્ટ અને પ્લેટફોર્મ ચલાવવામાં થયેલી ભૂલો/Errors માટે માફી માંગી છે. માહિતી અનુસાર, ભારત સરકારે મેટાને સ્પષ્ટપણે જણાવી દીધું છે કે તેઓ ‘ઇન્ટરમીડિયરી’ (મધ્યસ્થ) ની વ્યાખ્યાના દાયરામાં નથી આવતા. તેઓ પોતે નક્કી કરે છે કે કન્ટેન્ટ કોને મળશે. તેથી, IT એક્ટ હેઠળ મળતી ‘સેફ હાર્બર’ (સુરક્ષા) ની સુવિધા તેમના પર લાગુ થતી નથી. માર્ક ઝુકરબર્ગે સ્વીકાર્યું છે કે કેટલાક ચોક્કસ પ્રકારના કન્ટેન્ટને પ્રોત્સાહન આપવા માટે ઘણા પૈસા આપવામાં આવ્યા હતા. તેમણે આ ભૂલ માટે માફી માંગી છે અને અફસોસ વ્યક્ત કર્યો છે.
મેટાને આપવામાં આવ્યું હતું 3 દિવસનું અલ્ટીમેટમ
સૂત્રોના જણાવ્યા અનુસાર, મેટાના સીઇઓ માર્ક ઝુકરબર્ગે બાળ જાતીય શોષણ સામગ્રી, ડીપફેક સામગ્રી અને પ્લેટફોર્મના સંચાલનમાં આવેલી ક્ષતિઓ બદલ માફી માંગી છે. સંસદની એક સ્થાયી સમિતિએ PM મોદીનો વીડિયો ફેસબુક પરથી હટાવવાના મામલે બુધવારે મેટાના પ્રમુખ માર્ક ઝુકરબર્ગને માફી માંગવા માટે ત્રણ દિવસનો સમય આપ્યો હતો. આ સિવાય સંસદીય સ્થાયી સમિતિએ એવા ઇન્ટરમીડિયરી પ્લેટફોર્મ્સ સામે પણ એક્શનની માંગ કરી હતી જેના પર બાળ જાતીય શોષણ સાથે જોડાયેલી સામગ્રી અને મહિલાઓ વિરુદ્ધ અપમાનજનક સામગ્રી હોય છે.
PM મોદીનો વીડિયો હટાવ્યા બાદ મચ્યો હતો બબાલ
તમને જણાવી દઈએ કે બુધવારે મેટાની ગ્લોબલ ટીમે IT મંત્રાલયના વરિષ્ઠ અધિકારીઓ સાથે મુલાકાત કરી હતી. PM મોદી દ્વારા પેપર લીક અંગે યુવાનોને સંબોધિત કરતા પોસ્ટ કરવામાં આવેલા વીડિયો સંદેશને ફેસબુક પરથી હટાવવાની ઘટના બાદ ભારે વિવાદ જોવા મળ્યો હતો. કેન્દ્ર સરકારે કંપનીના અધિકારીઓને તેડું પણ મોકલ્યું હતું. મેટા અને સરકારના અધિકારીઓ વચ્ચે યોજાયેલી આ બેઠકમાં મહત્વપૂર્ણ પોસ્ટ્સ પર કરવામાં આવેલી ખોટી કાર્યવાહી, સોશિયલ મીડિયા પ્લેટફોર્મ પર બાળ જાતીય શોષણ અને ઉત્પીડન સામગ્રી (CSAM) પર અસરકારક રોક લગાવવામાં ભૂલ અને અન્ય નિયમનકારી મુદ્દાઓ પર ચર્ચા થઈ હતી.
કેવી રીતે હટ્યો હતો PM મોદીનો વીડિયો?
હકીકતમાં, NEET પેપર લીકના મુદ્દે દિલ્હીના જંતર મંતર પર ભારે વિરોધ પ્રદર્શન જોવા મળ્યું હતું. આવા સમયે PM મોદીએ યુવાનોને સંબોધિત કરતા એક વીડિયો પોસ્ટ કર્યો હતો અને પેપર લીકના કેસો પર કડક કાર્યવાહીની ખાતરી આપી હતી. આ વીડિયોએ ઇન્સ્ટાગ્રામ પર તમામ રેકોર્ડ તોડી નાખ્યા હતા અને તે 24 કલાકમાં સૌથી વધુ જોવાયેલો વીડિયો બની ગયો હતો. જોકે, ફેસબુકે PM મોદીના આ વીડિયોને હટાવી દીધો હતો જે બાદ ભારે વિવાદ થયો હતો. વિવાદ બાદ મેટાના પ્રવક્તાએ કહ્યું, “તે કન્ટેન્ટ ભૂલથી હટાવી દેવામાં આવ્યું હતું અને હવે તેને પુનઃસ્થાપિત (Restore) કરી દેવામાં આવ્યું છે.”
