ગ્લાસગો કોમનવેલ્થ ગેમ્સ 2026 શરૂ થાય તે પહેલાં જ ભારતીય ટીમ માટે માઠા સમાચાર આવ્યા છે. વર્ષ 2022ની બર્મિંગહામ કોમનવેલ્થ ગેમ્સની સિલ્વર મેડલિસ્ટ જુડો ખેલાડી તૂલિકા માનને નેશનલ એન્ટી ડોપિંગ એજન્સી (NADA) દ્વારા અસ્થાયી રૂપે સસ્પેન્ડ કરવામાં આવ્યા છે.
આ કાર્યવાહીના કારણે તૂલિકા માન હવે ગ્લાસગોમાં યોજાનાર કોમનવેલ્થ ગેમ્સમાં ભાગ લઈ શકશે નહીં.
શા માટે કરવામાં આવ્યા સસ્પેન્ડ?
નાડા (NADA) ના જણાવ્યા અનુસાર, તૂલિકા માન પર છેલ્લા 12 મહિનામાં ત્રણ વખત ‘વેરઅબાઉટ્સ ફેઇલ્યોર’ (Whereabouts Failure) નો આરોપ લાગ્યો છે.
-
નિયમ શું છે: ખેલાડીઓએ અચાનક ડોપ ટેસ્ટ માટે પોતાના સ્થાન અને સમયની ચોક્કસ માહિતી આપવી પડે છે.
-
નિયમભંગ: જો કોઈ ખેલાડી સતત આ માહિતી આપવામાં નિષ્ફળ જાય અથવા આપેલા સ્થળે ન મળે, તો તેને નિયમોનું ઉલ્લંઘન માનવામાં આવે છે.
-
મહત્વની સ્પષ્ટતા: વેરઅબાઉટ્સ ફેઇલ્યોરનો અર્થ એ નથી કે ખેલાડી ડોપ ટેસ્ટમાં પોઝિટિવ આવ્યો છે.
આ નોટિસ મળ્યા બાદ ભારતીય જુડો ટીમમાંથી તેમનું નામ પાછું ખેંચી લેવામાં આવ્યું છે.
બર્મિંગહામમાં જીત્યો હતો સિલ્વર મેડલ
તૂલિકા માને બર્મિંગહામ કોમનવેલ્થ ગેમ્સ 2022માં મહિલાઓની +78 કિલોગ્રામ કેટેગરીમાં સિલ્વર મેડલ જીતીને ભારતનું નામ રોશન કર્યું હતું. આ વખતે પણ ગ્લાસગોમાં તેમની પાસેથી મેડલની મોટી આશા હતી.
ભારતીય જુડો ટીમને સતત બીજો ઝાટકો
આ અગાઉ પુરુષોની -73 કિલોગ્રામ કેટેગરીના ખેલાડી અરુણ કુમાર પણ સ્પર્ધામાંથી બહાર થઈ ગયા હતા. તેઓ આઉટ-ઓફ-કમ્પિટિશન ડોપ ટેસ્ટમાં નિષ્ફળ રહ્યા હતા.
ભારતીય જુડો ટીમ 27 જુલાઈએ ગ્લાસગો જવા માટે રવાના થવાની છે અને જુડો મેચો 31 જુલાઈથી શરૂ થશે. તે પહેલા જ બે મહત્વના ખેલાડીઓ બહાર થઈ જતાં ભારતીય ટીમને મોટો ફટકો પડ્યો છે.
