સોશિયલ મીડિયા પર અત્યારે બોલિવૂડના કિંગ ખાન એટલે કે શાહરૂખ ખાનનો એક વીડિયો ભારે વાયરલ થઈ રહ્યો છે. આ વીડિયોમાં શાહરૂખ ખાન રાષ્ટ્રવાદી કોંગ્રેસ પાર્ટી (NCP – શરદચંદ્ર પવાર) ના સાંસદ સુપ્રિયા સુલેની દીકરી રેવતીના લગ્ન પહેલા યોજાયેલા સંગીત સમારોહમાં ધૂમ મચાવતા જોવા મળી રહ્યા છે. કિંગ ખાનને પોતાની સુપરહીટ ફિલ્મ ‘કુછ કુછ હોતા હૈ’ ના લોકપ્રિય ગીત ‘કોઈ મિલ ગયા’ પર ઝૂમતા જોઈને ફેન્સ ખુશ થઈ ગયા છે.
સિંગર રાહુલ વૈદ્યએ શેર કર્યો વીડિયો
સુપ્રિયા સુલેની દીકરી રેવતી સુલેના લગ્ન શનિવાર, 20 જૂન 2026ના રોજ બિઝનેસમેન સારંગ લાખાણી સાથે થઈ રહ્યા છે. આ ભવ્ય લગ્ન પ્રસંગના સંગીત સમારોહમાં જાણીતા સિંગર રાહુલ વૈદ્યએ પરફોર્મ કર્યું હતું. રાહુલે જ પોતાના ઈન્સ્ટાગ્રામ એકાઉન્ટ પર શાહરૂખ ખાનનો આ ડાન્સ વીડિયો શેર કર્યો છે. વીડિયો શેર કરતા રાહુલે કેપ્શનમાં લખ્યું, ‘ગઈકાલે રાત્રે કિંગ ખાને અમારા સ્ટેજની શોભા વધારી! રેવતી અને સારંગ માટે આ એક શાનદાર રાત હતી.’
View this post on Instagram
કિંગ ખાને જીત્યા ફેન્સના દિલ
સોશિયલ મીડિયા પર વાયરલ થઈ રહેલા આ વીડિયોમાં શાહરૂખ ખાનનો અંદાજ જોવા જેવો છે. શાહરૂખ ખાને માત્ર સ્ટેજ પર ડાન્સ જ ન કર્યો, પણ વર-વધૂને ગળે લગાવીને આશીર્વાદ પણ આપ્યા હતા. વીડિયોમાં આગળ શાહરૂખ ખાન સિંગર રાહુલ વૈદ્યને પણ ગળે લગાવે છે અને તેની સાથે પણ ડાન્સના થોડા સ્ટેપ્સ કરે છે. કિંગ ખાનના આ વિનમ્ર અને પ્રેમાળ અંદાજે ફરી એકવાર લોકોના દિલ જીતી લીધા છે.
શાહરૂખ ખાનની આગામી ફિલ્મો
બોલિવૂડના કિંગ ખાનના વર્કફ્રન્ટની વાત કરીએ તો, તેઓ હાલમાં તેમની આગામી ફિલ્મ ‘કિંગ’ (King) ના શૂટિંગમાં વ્યસ્ત છે. આ ફિલ્મનું નિર્દેશન સિદ્ધાર્થ આનંદ કરી રહ્યા છે. આ ફિલ્મમાં શાહરૂખ ખાન સાથે દીપિકા પાદુકોણ, અભિષેક બચ્ચન, સુહાના ખાન અને અનિલ કપૂર જેવા કલાકારો જોવા મળશે. આ ફિલ્મ 24 ડિસેમ્બર 2026ના રોજ ક્રિસમસ વીકેન્ડ પર સિનેમાઘરોમાં રિલીઝ થવાની શક્યતા છે.
