ચાઇલ્ડ આર્ટિસ્ટ રીવા અરોરા માત્ર ૨૦ વર્ષની ઉંમરે ખૂબ જ વૈભવી લાઈફ જીવે છે. તેણે નાની ઉંમરમાં મોટી સંપત્તિ અને નામ કમાઈ લીધું છે. પરંતુ તેની લાઈફ સાથે ઘણા વિવાદો પણ જોડાયેલા છે. વર્ષ ૨૦૨૩માં સોશિયલ મીડિયા પર એવી અફવાઓ ઉડી હતી કે રીવાએ ઝડપથી મોટો થવા માટે હોર્મોનલ ઇન્જેક્શન લીધા છે. તે પોતાની અસલી ઉંમર કરતા વધુ મોટી દેખાય છે. હવે એક્ટ્રેસે આ અફવાઓ પર આખરે પોતાની ચુપ્પી તોડી છે.
‘અમારા જીન્સ સારા છે, ઇન્જેક્શનથી મને ખૂબ ડર લાગે છે’
એક ઇન્ટરવ્યુમાં રીવાએ ઇન્જેક્શન લેવાની વાતને સંપૂર્ણપણે નકારી કાઢી છે. તેણે સ્પષ્ટતા કરતા કહ્યું, “અમારા જીન્સ એટલા સારા છે કે અમારે આવું કંઈ કરવાની જરૂર નથી પડતી. મારા ચહેરાના ફીચર્સ કુદરતી રીતે જ સારા છે.”
રીવાએ વધુમાં ઉમેર્યું, “હું ક્યારેય સુંદર કે મોટી દેખાવા માટે ઇન્જેક્શન ન લઈ શકું. મારાથી વધુ ઇન્જેક્શનથી કોઈ નહીં ડરતું હોય. મારી માતા હંમેશા કહે છે કે તમે જેવા છો તેવા જ રહો.” આ સાથે રીવાએ સાબિત કરી દીધું કે તે જેવી દેખાય છે તેવી એકદમ રિયલ છે.
પિતાના અવસાન બાદ માતાએ એકલા હાથે બધું સંભાળ્યું
પોતાના જીવનના સંઘર્ષ વિશે વાત કરતા રીવા ભાવુક થઈ ગઈ હતી. તેણે જણાવ્યું, “હું ખૂબ નાની હતી જ્યારે મારા પિતા આ દુનિયા છોડીને ચાલ્યા ગયા. તે પછી મારી માતાએ એક રાતમાં મુંબઈ જવાનો મોટો નિર્ણય લીધો.”
રીવાએ કહ્યું કે તેની માતા ખૂબ જ મજબૂત મહિલા છે. મુંબઈ આવ્યા બાદ તેની માતાએ થોડા જ દિવસોમાં ઘર શોધ્યું, ગાડી ખરીદી અને રીવાનું સ્કૂલમાં એડમિશન પણ કરાવ્યું. પિતાના ગયા પછી તેની માતાએ બધું એકલા હાથે મેનેજ કર્યું અને તેને એક સારી લાઈફ આપી.
ઉંમરના વિવાદ પર રીવાએ શું કહ્યું?
લોકો તેની ઉંમર વિશે અવારનવાર સોશિયલ મીડિયા પર જાતજાતની વાતો કરતા રહે છે. આ અંગે રીવાએ કહ્યું, “મને ખબર છે કે લોકો મારી ઉંમર વિશે વાતો કરે છે. કોઈ મને મોટી કહે છે તો કોઈ નાની. પરંતુ મને આ વાતોથી હવે કોઈ ફરક પડતો નથી. જેને જે વિચારવું હોય તે વિચારે.”
< /p>
