જામા મસ્જિદ ; ભરૂચની ઐતિહાસિક જુમ્મા (જામા) મસ્જિદને લઈને છેલ્લા 6 મહિનાથી ચાલી રહેલો વિવાદ હવે ચરમસીમાએ પહોંચ્યો છે. મસ્જિદનું વર્ષોથી બંધ ભોંયરું પુરાતત્વ વિભાગે ખોલતા જ નવો વળાંક આવ્યો છે. જૈન સંગઠનોનો દાવો છે કે આ ભોંયરામાંથી જૈન દેવી-દેવતાઓની પૌરાણિક મૂર્તિઓ મળી આવી છે. આ વિવાદના ભાગરૂપે આગામી 15 જૂનના રોજ ભરૂચમાં એક વિશાળ મહારેલીનું આયોજન કરવામાં આવ્યું છે.
ભોંયરું ખોલવાનો વીડિયો વાયરલ થતાં વિવાદ વકર્યો
તાજેતરમાં પુરાતત્વ વિભાગ દ્વારા સફાઈ કામગીરી માટે મસ્જિદના ભોંયતળિયાનો દરવાજો ખોલવામાં આવ્યો હતો. આ કામગીરીનો વીડિયો સોશિયલ મીડિયા પર વાયરલ થયો છે.
-
જૈન પક્ષનો દાવો: 700 વર્ષથી બંધ આ ભોંયરામાં 19મા જૈન તીર્થંકર ભગવાન મલ્લિનાથ અને અન્ય દેવી-દેવતાઓની પ્રાચીન પ્રતિમાઓ તથા અવશેષો છે.
-
મુસ્લિમ પક્ષની દલીલ: આ મસ્જિદ સત્તાવાર રીતે સરકારી ગેજેટ અને વકફ બોર્ડના રેકોર્ડ પર નોંધાયેલી છે. ટ્રસ્ટીઓની જાણ બહાર ભોંયરું ખોલીને ખોટો વિવાદ ઊભો કરાઈ રહ્યો છે. મુસ્લિમ પક્ષે આ મામલે હાઈકોર્ટના દ્વાર ખખડાવ્યા છે.
સ્થાપત્ય શૈલી અને ઇતિહાસ અંગે સંતોના મોટા દાવા
શંકરાચાર્ય મઠના વ્યવસ્થાપક મુક્તાનંદ સ્વામી અને સુદર્શન નાગરાજ બાબા સહિતના સંતોએ આ સ્થળનું બારીકાઈથી નિરીક્ષણ કર્યું હતું. તેમણે નીચે મુજબના દાવા કર્યા છે:
-
પ્રાચીન મૂર્તિઓ: મસ્જિદના મુખ્ય પ્રવેશદ્વારની ઉપર ભગવાન મહાવીર સ્વામી અને નીચે ચક્રધર સ્વામીની પ્રતિમાઓ દ્રશ્યમાન થાય છે.
-
બાંધકામની શૈલી: મસ્જિદના પિલ્લરો અને દીવાલો પરની કલાત્મક કોતરણી ભારતીય સંસ્કૃતિ અને જૈન મંદિરોની સ્થાપત્ય શૈલીને સમાન છે.
-
ઇતિહાસ: શ્રીલંકાના રાજાની પુત્રી સુદર્શનાએ પૂર્વભવની સ્મૃતિમાં આ ભવ્ય ‘સમરી વિહાર’ નું નિર્માણ કરાવ્યું હતું. આ પરિસરમાં એક ઐતિહાસિક પાતાળ કૂવો પણ આવેલો છે.
પુરાતત્વ વિભાગની ભૂમિકા સામે ઉઠ્યા સવાલો
આ ઐતિહાસિક સ્મારક પુરાતત્વ વિભાગ અંતર્ગત સુરક્ષિત છે. તેમ છતાં તંત્રની ઘોર બેદરકારી સામે આવી હોવાના આક્ષેપો સંતો દ્વારા કરાયા છે:
-
મસ્જિદ પરિસરમાં ગેરકાયદેસર રીતે વજુખાનાનું નિર્માણ કરાયું હતું, જેને તાજેતરમાં દૂર કરાયું છે.
-
પુરાતત્વ વિભાગના સ્થાનિક અધિકારી સામે સવાલો ઉઠ્યા છે કે સરકારી નિયમોનું ઉલ્લંઘન કરીને આ સંકુલમાં વીજ મીટર અને સાઉન્ડ સિસ્ટમની મંજૂરી કોણે આપી?
15 જૂને ભરૂચમાં મહારેલી: કલેક્ટરને અપાશે આવેદનપત્ર
આગામી 15 જૂને યોજાનારી આ મહારેલીમાં ગુજરાત અને મહારાષ્ટ્રમાંથી અંદાજે 5 થી 7 હજાર જેટલા જૈન શ્રદ્ધાળુઓ, હિન્દુ સંગઠનો અને સંતો-મહંતો જોડાશે.
હજારોની સંખ્યામાં એકઠા થયેલા લોકો એક વિશાળ પદયાત્રા સ્વરૂપે કલેક્ટર કચેરી પહોંચશે. આ આંદોલન દ્વારા સમગ્ર સમાજ ભરૂચની આ જામા મસ્જિદને સત્તાવાર રીતે ‘જૈન સમરી વિહાર’ તરીકે જાહેર કરવાની અને તેને તેના મૂળ સ્વરૂપમાં પ્રસ્થાપિત કરવાની માંગણી કલેક્ટર સમક્ષ રજૂ કરશે.
< /p>
