મેદાન પર શું બની હતી ઘટના?
એકાના સ્ટેડિયમમાં રમાયેલી આ મેચમાં જ્યારે નિકોલસ પૂરન બેટિંગ કરી રહ્યો હતો, ત્યારે કૃણાલ પંડ્યાએ તેને એક તેજ બાઉન્સર ફેંક્યો હતો. આ બોલ બાદ બંને વચ્ચે મેદાન પર કંઈક વાતચીત થઈ હતી. મેચ પૂરી થયા બાદ એક વીડિયો સામે આવ્યો જેમાં પૂરન કૃણાલનું ગળું પકડતો દેખાયો, જેનાથી ફેન્સમાં બંને વચ્ચે ઝઘડો થયો હોવાની અટકળો શરૂ થઈ ગઈ હતી.
કૃણાલ પંડ્યાએ તોડી ચુપ્પી
સોશિયલ મીડિયા પર વધતા વિવાદને જોતા કૃણાલ પંડ્યાએ પોતે સામે આવીને સ્પષ્ટતા કરી છે. તેણે ઇન્સ્ટાગ્રામ પર પૂરન સાથેનો ફોટો શેર કરીને લખ્યું કે, “કોઈ લફડું નથી, માત્ર પ્રેમ છે મારા ભાઈ”. તેણે પૂરનને તેની 100મી IPL મેચ પૂર્ણ કરવા બદલ અભિનંદન પણ પાઠવ્યા હતા.
માત્ર મિત્રતાની મજાક હતી
નિકોલસ પૂરને પણ કૃણાલની પોસ્ટ પર કોમેન્ટ કરીને જણાવ્યું કે કૃણાલ તેના શ્રેષ્ઠ મિત્રોમાંનો એક છે. વાસ્તવમાં, વીડિયોમાં જે ગરમાગરમી દેખાતી હતી તે માત્ર બે મિત્રો વચ્ચેની મજાક હતી. વીડિયોના અંતે બંને ખેલાડીઓ હસતા અને દોસ્તાના અંદાજમાં વાત કરતા પણ જોવા મળ્યા હતા.
લખનઉ સુપર જાયન્ટ્સ માટે 2023 અને 2024 થી સાથે રમી રહેલા આ બંને ખેલાડીઓ વચ્ચેના મજબૂત સંબંધોએ તમામ અફવાઓ પર વિરામ લગાવી દીધો છે.
