ભાયાવદર કોલેજ ભરતી કૌભાંડ: પરીક્ષા પહેલા જે નામ આપ્યું હતું એ જ ઉમેદવારની પસંદગી! જાણો શું છે સમગ્ર મામલો

ભાયાવદર: રાજ્યમાં ફરી એકવાર ભરતી પ્રક્રિયામાં ‘સેટિંગ’ના આરોપોએ ખળભળાટ મચાવ્યો છે. ભાયાવદરની શ્રી એચ.એલ. પટેલ આર્ટ્સ એન્ડ કોમર્સ કોલેજમાં જુનિયર ક્લાર્કની ભરતીમાં પૂર્વ-આયોજિત ખેલ ખેલાયો હોવાના ગંભીર આક્ષેપો થયા છે.

શું છે સમગ્ર ઘટના?

ભાયાવદર કોલેજમાં જુનિયર ક્લાર્ક (વર્ગ-૩) ની એક જગ્યા માટે ભરતી પ્રક્રિયા હાથ ધરવામાં આવી હતી. આ ભરતી માટે ૨૦ સપ્ટેમ્બર ૨૦૨૫ ના રોજ NOC મળી હતી. જેનું આખરી પરિણામ ૧ મે ૨૦૨૬ ના રોજ જાહેર થયું છે.

ભવિષ્યવાણી સાચી પડી?

સૌથી ચોંકાવનારી વાત એ છે કે, વિદ્યાર્થી નેતા યુવરાજસિંહ જાડેજાએ આ પરીક્ષા લેવાય તે પહેલા જ શિક્ષણ વિભાગને લેખિતમાં જાણ કરી હતી. તેમણે આશંકા વ્યક્ત કરી હતી કે આ ભરતીમાં ‘ભુવા હર્ષ અનિલભાઈ’ નામના ઉમેદવારની જ પસંદગી થશે. નવાઈની વાત એ છે કે, પરિણામ જાહેર થતા એ જ ઉમેદવાર પ્રથમ ક્રમે પસંદ થયા છે.

ભરતી પ્રક્રિયાની ટાઈમલાઇન:

• પ્રાથમિક પરીક્ષા: ૧૬ માર્ચ ૨૦૨૬

• મુખ્ય પરીક્ષા: ૧૯ એપ્રિલ ૨૦૨૬

• આખરી પરિણામ: ૧ મે ૨૦૨૬

યુવરાજસિંહ જાડેજાના આકરા સવાલો

વિદ્યાર્થી નેતાએ સોશિયલ મીડિયા પર પુરાવાઓ સાથે સરકારને ઘેરી છે. તેમણે સવાલ ઉઠાવ્યો છે કે:

• જો નામ જોગ અગાઉ રજૂઆત કરી હતી, તો તપાસ કેમ ન થઈ?

• શું શિક્ષણ સંસ્થાઓમાં લાયક ઉમેદવાર માટે કોઈ જગ્યા નથી?

• શું આ માત્ર ‘સેટિંગ’ કરનારાઓ માટે જ ભરતી હતી?

મુખ્ય માંગણીઓ:

૧. આ ભરતી પ્રક્રિયાને તાત્કાલિક સ્થગિત કરવામાં આવે. ૨. હાઈકોર્ટના સીટિંગ જજ દ્વારા નિષ્પક્ષ તપાસ થાય. ૩. જવાબદાર કોલેજ મેનેજમેન્ટ વિરુદ્ધ ફોજદારી ગુનો નોંધાય.

આ કિસ્સાએ ફરી એકવાર પારદર્શક પરીક્ષા પદ્ધતિ સામે પ્રશ્નાર્થ ચિન્હ ઉભા કર્યા છે.