ટીવીની લોકપ્રિય અભિનેત્રી દીપિકા કક્કડ છેલ્લા એક વર્ષથી લિવર કેન્સર જેવી ગંભીર બીમારી સામે લડી રહી છે. હાલમાં જ થયેલા એમઆરઆઈ (MRI) સ્કેનમાં દીપિકાના શરીરમાં બે નવી સિસ્ટ (ગાંઠ) જોવા મળી છે, જેના કારણે ચાહકો અને પરિવારની ચિંતામાં વધારો થયો છે.
એમઆરઆઈ સ્કેનમાં થયો ખુલાસો
દીપિકાના પતિ અને અભિનેતા શોએબ ઇબ્રાહિમે પોતાના વ્લોગમાં આ ચોંકાવનારી જાણકારી આપી છે. શોએબે જણાવ્યું કે, ગત સોમવારે કરાવેલા એમઆરઆઈ રિપોર્ટમાં બે નાની સિસ્ટ જોવા મળી છે. આ ગાંઠો એટલી નાની છે કે તે સીટી સ્કેનમાં પણ દેખાતી નહોતી. અત્યારે આ ગાંઠો ખૂબ નાની હોવાથી ડોક્ટરો તેના પર કોઈ તાત્કાલિક એક્શન લઈ શકશે નહીં.
હવે શરૂ થશે ‘ઇમ્યુનોથેરાપી’
કેન્સર સામેની લડાઈને વધુ મજબૂત બનાવવા માટે ડોક્ટરોએ દીપિકાની ઇમ્યુનોથેરાપી શરૂ કરવાનો નિર્ણય લીધો છે.
-
આ અઠવાડિયાથી દીપિકાની થેરાપી શરૂ થશે.
-
દર 20 દિવસે એકવાર હોસ્પિટલ જવું પડશે.
-
દરેક સેશન 4 થી 5 કલાકનું રહેશે.
-
એક મહિના બાદ ફરીથી સ્કેન કરીને ગાંઠની સ્થિતિ તપાસવામાં આવશે.
દીપિકાની હાલત જોઈ નાનો પુત્ર રુહાન પણ પરેશાન
લગાતાર હોસ્પિટલના ચક્કર અને બીમારીના કારણે દીપિકાના પુત્ર રુહાન પર પણ તેની અસર જોવા મળી રહી છે. દીપિકાએ ભાવુક થઈને કહ્યું કે, “અમે વ્યસ્ત હોવાથી રુહાનને પૂરતો સમય આપી શકતા નથી. તે હવે ચીડિયો થઈ ગયો છે અને અમારું ધ્યાન ખેંચવા ગુસ્સો વ્યક્ત કરે છે.” હોસ્પિટલની દોડધામમાં આખો પરિવાર અત્યારે માનસિક અને શારીરિક રીતે થાકી ગયો છે.
કેન્સર સામે દીપિકાનો લાંબો સંઘર્ષ
નોંધનીય છે કે, ગયા વર્ષે મે મહિનામાં દીપિકાના લિવરમાં ટેનિસ બોલ જેવડો મોટો ટ્યુમર જોવા મળ્યો હતો. ત્યારપછી આ વર્ષે માર્ચમાં પણ એક સિસ્ટનું ઓપરેશન કરવામાં આવ્યું હતું. દીપિકાએ હિંમત હાર્યા વગર કહ્યું કે, જે થઈ ગયું તેને આપણે બદલી શકતા નથી, બસ આપણે તેનો સકારાત્મક રીતે સામનો કરવાનો છે.
