ગુજરાતમાં સ્થાનિક સ્વરાજની ચૂંટણીઓનો શંખનાદ ફૂંકાઈ ચૂક્યો છે, પરંતુ બનાસકાંઠાના થરાદમાં રાજકીય પક્ષો માટે મુશ્કેલી સર્જાઈ શકે છે. થરાદ નગરપાલિકાના સાતેય વોર્ડના રહીશો પાયાની સુવિધાઓના અભાવે સત્તાધારી પક્ષ અને સ્થાનિક તંત્ર સામે મેદાને ઉતર્યા છે. વિકાસના મોટા-મોટા દાવાઓ વચ્ચે થરાદની વાસ્તવિકતા કંઈક અલગ જ હોવાનું સ્થાનિકોની રજૂઆતો પરથી સ્પષ્ટ જણાઈ રહ્યું છે.
થરાદ માં સાતેય વોર્ડની એકસમાન દયનીય સ્થિતિ
થરાદ ના રહીશોનો આક્ષેપ છે કે વર્ષોથી અનેક રજૂઆતો કરવા છતાં તંત્ર દ્વારા કોઈ નક્કર કામગીરી કરવામાં આવતી નથી. ખાસ કરીને વોર્ડ નંબર 4 માં વસતા વાલ્મિકી સમાજના લોકોની સ્થિતિ અતિ દયનીય છે. આ વિસ્તારમાં વિકાસના નામે મીંડું હોવાનું જણાઈ રહ્યું છે. નગરપાલિકા દ્વારા અહીં રસ્તા, ગટર કે પાણીની કોઈ વ્યવસ્થા કરવામાં આવી નથી. ગરીબ પરિવારો સુધી હજુ પણ સરકારની મકાન સહાય જેવી પાયાની યોજનાઓ પણ પહોંચી નથી, જે તંત્રની ઘોર ઉદાસીનતા દર્શાવે છે.
પાયાની સુવિધાઓનો અભાવ અને સ્થાનિકોની સમસ્યાઓ
થરાદની જનતા અત્યારે અનેક ગંભીર સમસ્યાઓથી ઘેરાયેલી છે, જે નીચે મુજબ છે:
-
ગટરની સમસ્યા: ઉભરાતી ગટરોને કારણે માર્ગો પર ગંદા પાણી ફરી વળ્યા છે, જેનાથી ભયંકર રોગચાળો ફાટી નીકળવાનો ભય રહે છે.
-
પીવાનું પાણી: અનેક વિસ્તારોમાં પીવાનું શુદ્ધ પાણી મળવું દુર્લભ બન્યું છે, જેના કારણે મહિલાઓને દૂર-દૂર સુધી પાણી લેવા જવું પડે છે.
-
બિસ્માર રસ્તા: યોગ્ય રોડ-રસ્તાના અભાવે વાહનચાલકો અને રાહદારીઓ અકસ્માતનો ભય અનુભવી રહ્યા છે.
-
વીજ પુરવઠો: અનિયમિત વીજળીને કારણે જનજીવન અને વેપાર-ધંધા પર માઠી અસર પડી રહી છે.
ચૂંટણી બહિષ્કાર અને નેતાઓ સામે આક્રોશ
ચૂંટણી સમયે મત માંગવા આવતા નેતાઓ સામે જનતામાં ઉગ્ર રોષ જોવા મળી રહ્યો છે. સ્થાનિકોનું કહેવું છે કે, “ચૂંટણી સમયે નેતાઓ વચનોની લ્હાણી કરે છે, પરંતુ જીત્યા પછી મોઢું બતાવવા પણ આવતા નથી.” હવે જનતા જાગૃત બની છે અને ‘ચૂંટણીમાં જોઈ લેશું’ તેવી ચીમકી ઉચ્ચારી રહી છે. જો આગામી દિવસોમાં ગટર અને પાણી જેવા પ્રશ્નોનું નિરાકરણ નહીં આવે, તો સત્તાધારી પક્ષને મતદારોના રોષનો સામનો કરવો પડી શકે છે. થરાદની જનતાએ સ્પષ્ટ સંકેત આપ્યો છે કે હવે માત્ર વાયદા નહીં, પણ વાસ્તવિક કામ જોઈએ છે.
