ભારતમાં ઇન્ટરનેટ અને સોશિયલ મીડિયા પર ધૂમ મચાવ્યા બાદ હવે ‘કોકરોચ જનતા પાર્ટી’ (Cockroach Janta Party) નો ક્રેઝ પાકિસ્તાન સુધી પહોંચી ગયો છે. ભારતમાં ચીફ જસ્ટિસના એક નિવેદન સામે નારાજગી વ્યક્ત કરવાથી શરૂ થયેલા આ ટ્રેન્ડે સોશિયલ મીડિયા આંદોલનનું રૂપ લીધું છે. ભારતીય પેજ પર ઇન્સ્ટાગ્રામ પર આશરે 20 મિલિયન (2 કરોડ) જેટલા ફોલોઅર્સ થઈ ગયા છે. આ જબરદસ્ત સફળતા જોઈને હવે પાકિસ્તાનમાં પણ ‘કોકરોચ અવામી પાર્ટી’ (Cockroach Awami Party) ના નામે પેજ અને પ્રોફાઈલ બનવા લાગ્યા છે.
ભારતમાંથી પ્રેરણા લીધાની ખુલ્લેઆમ કબૂલાત
પાકિસ્તાનમાં પણ અત્યારે કોકરોચ ટ્રેન્ડ સાથે જોડાયેલા અનેક સોશિયલ મીડિયા એકાઉન્ટ્સ સામે આવી રહ્યા છે. આમાં સૌથી પહેલું ઇન્સ્ટાગ્રામ પેજ ‘કોકરોચ અવામી પાર્ટી’ નામથી શરૂ થયું છે. આ પેજના એડમિને ખુલ્લેઆમ સ્વીકાર્યું છે કે તેમણે ભારતની કોકરોચ જનતા પાર્ટીના પેજ પરથી જ પ્રેરણા લીધી છે. પેજના બાયોમાં (Bio) લખવામાં આવ્યું છે કે, “હા, અમે કોપી કર્યું છે, પણ તેનાથી શું ફરક પડે છે? અમારો હેતુ પણ એ જ છે.”
લોગોમાં પાકિસ્તાની રંગ અને વાયરલ રીલ્સ
આ પાકિસ્તાની કોકરોચ પેજનો લોગો ભારતના અસલી પેજ જેવો જ રાખવામાં આવ્યો છે. પરંતુ તેમાં પાકિસ્તાનના ધ્વજ પ્રમાણે લીલા અને સફેદ રંગનો ઉપયોગ કરાયો છે. આ પેજની પ્રથમ વાયરલ રીલ પણ ખૂબ ચર્ચામાં છે. આ રીલમાં લોકોને સવાલ પૂછવામાં આવે છે કે, “તમે ઈમરાન ખાનની પાર્ટી PTI સાથે છો કે નવાઝ શરીફની PML-N સાથે?” ત્યારબાદ વીડિયોમાં જ જવાબ મળે છે કે, “ના, અમે તો કોકરોચ અવામી પાર્ટી સાથે છીએ.”
ટ્રેન્ડનો ફાયદો ઉઠાવવા કન્ટેન્ટ ક્રિએટર્સમાં હોડ
પાકિસ્તાનમાં અત્યારે આ એક જ એકાઉન્ટ નથી, પરંતુ ઇન્સ્ટાગ્રામ પર સર્ચ કરતા ‘કોકરોચ અવામી પાર્ટી’ નામથી અસંખ્ય પેજ જોવા મળી રહ્યા છે. દરેક બીજો કન્ટેન્ટ ક્રિએટર આ વાયરલ ટ્રેન્ડનો ફાયદો ઉઠાવીને ફોલોઅર્સ વધારવાની દોડમાં સામેલ થયો છે. જો કે, હાલમાં આ નવા પાકિસ્તાની પેજીસના ફોલોઅર્સ ઘણા ઓછા છે, પરંતુ સોશિયલ મીડિયા પર તેની ચર્ચા ખૂબ ઝડપથી વધી રહી છે.
