બોલિવૂડના સૌથી લોકપ્રિય કપલ્સમાંથી એક વિક્કી કૌશલ અને કેટરિના કૈફ તાજેતરમાં જ માતા-પિતા બન્યા છે. બંને પોતાના દીકરા વિહાનના જન્મ પછી પેરેન્ટહુડનો આનંદ માણી રહ્યા છે. વિક્કી અને કેટરિનાએ હજી સુધી પોતાના દીકરાનો ચહેરો મીડિયા કે ફેન્સ સામે જાહેર કર્યો નથી.
પરંતુ તાજેતરમાં જ વિક્કી કૌશલના પિતા અને જાણીતા એક્શન ડાયરેક્ટર શામ કૌશલે પોતાના પૌત્ર વિશે એક મોટો ખુલાસો કર્યો છે. તેમણે જણાવ્યું છે કે વિહાન કોના જેવો દેખાય છે.
મમ્મી કેટરિના કે પપ્પા વિક્કી, કોના જેવો છે ચહેરો?
એક ઈન્ટરવ્યુ દરમિયાન જ્યારે શામ કૌશલને પૂછવામાં આવ્યું કે વિહાન કોના જેવો દેખાય છે? ત્યારે તેમણે ખુશ થઈને જવાબ આપ્યો કે, “મને લાગે છે કે તે તેના પપ્પા વિક્કી કૌશલ જેવો દેખાય છે.” શામ કૌશલે એ પણ જણાવ્યું કે વિક્કી બાળપણમાં જરાય તોફાની નહોતો, તે ખૂબ જ સમજદાર બાળક હતો.
પૌત્રના આવવાથી જિંદગી બદલાઈ ગઈ
દાદા બનવાની ખુશી વ્યક્ત કરતા શામ કૌશલે કહ્યું કે, “વિહાનના આવવાથી મારી જિંદગી સંપૂર્ણપણે બદલાઈ ગઈ છે. હું જ્યારે પણ કામમાં વ્યસ્ત હોઉં અને તેને મળી ન શકું, ત્યારે વીડિયો કોલ પર તેની સાથે વાત કરી લઉં છું. તે ખૂબ જ ક્યૂટ છે અને આ ખુશી માટે હું ભગવાનનો જેટલો આભાર માનું એટલો ઓછો છે.”
વહુ કેટરિનાના કર્યા વખાણ, રિટાયરમેન્ટ પર કહી આ વાત
પોતાના પરિવાર વિશે વાત કરતા શામ કૌશલે કહ્યું કે તે નસીબદાર છે કે તેમને વિક્કી અને સની જેવા સારા દીકરા અને કેટરિના જેવી ખૂબ જ સારી વહુ મળી છે.
જ્યારે તેમને કામમાંથી નિવૃત્તિ (Retirement) વિશે પૂછવામાં આવ્યું ત્યારે તેમણે કહ્યું કે, “બાળકો મને કામ બંધ કરવા માટે કહે છે. પરંતુ હું ૯ વર્ષની ઉંમરથી કામ કરી રહ્યો છું, કામ વગર હું શું કરીશ? પહેલા હું પરિવારની ચિંતામાં કામ કરતો હતો, હવે હું આર્થિક રીતે સુરક્ષિત છું એટલે મને કામ કરવાની વધુ મજા આવે છે.”
એરપોર્ટ પર થઈ હતી પેપરાઝી સાથે મુલાકાત
આ વર્ષની શરૂઆતમાં વિક્કી કૌશલ અને કેટરિના કૈફ એરપોર્ટ પર સ્પોટ થયા હતા. તે સમયે કેટરિનાએ વિહાનને તેડ્યો હતો. કેટરિનાએ ખૂબ જ નમ્રતાપૂર્વક ફોટોગ્રાફર્સને વિહાનના ફોટા ન પાડવા વિનંતી કરી હતી, કારણ કે તેઓ બાળકને મીડિયાની લાઈમલાઈટથી દૂર રાખવા માંગે છે.
