ઓડિશાના ક્યોંઝર જિલ્લામાંથી માનવતા અને બેંકિંગ સિસ્ટમ પર સવાલ ઉઠાવતી એક અત્યંત ચોંકાવનારી ઘટના સામે આવી છે. પોતાની મૃત બહેનના ખાતામાંથી પૈસા ઉપાડવા માટે એક ભાઈ તેની બહેનનો કંકાલ ખભા પર ઉંચકીને બેંક પહોંચી ગયો હતો. એક ભાઈએ પોતાની મૃત બહેનના બેંક ખાતામાંથી પૈસા ઉપાડવા માટે અકલ્પનીય પગલું ભર્યું. જ્યારે બેંકે ડેથ સર્ટિફિકેટ માંગ્યું, ત્યારે તે વ્યક્તિએ કબરમાંથી તેનું હાડપિંજર બહાર કાઢ્યું. આ ઘટનાથી સમગ્ર વિસ્તારમાં સનસનાટી મચી ગઈ.
શું છે સમગ્ર મામલો?
આ ઘટના ક્યોંઝર જિલ્લાના પટના વિસ્તારના દિયાનાલી ગામની છે. અહીં રહેતા જિતુ મુંડાની બહેનનું બે મહિના પહેલા બીમારીના કારણે મૃત્યુ થયું હતું. તેની બહેને પશુઓ વેચીને અંદાજે રૂ. 19,000 કમાણી કરી હતી, જે ઓડિશા ગ્રામ્ય બેંકની સ્થાનિક શાખામાં જમા હતી. બહેનના મૃત્યુ બાદ જિતુ તેના ખાતામાંથી આ પૈસા ઉપાડવા માંગતો હતો.
બેંકે માંગ્યું ડેથ સર્ટિફિકેટ અને ભાઈ લઈ આવ્યો કંકાલ
જિતુ જ્યારે બેંકમાં પૈસા લેવા ગયો ત્યારે અધિકારીઓએ નિયમ મુજબ મૃત્યુનું પ્રમાણપત્ર (Death Certificate) અને અન્ય જરૂરી દસ્તાવેજો માંગ્યા હતા. અભણ અને જાગૃતિના અભાવે જિતુએ એક ખતરનાક ડગલું ભર્યું:
-
તેણે પોતાની બહેનની કબર ખોદીને તેનો મૃત્તદેહ (કંકાલ) બહાર કાઢ્યો.
-
કંકાલને ખભા પર મૂકીને તે 3 કિલોમીટર સુધી પગપાળા ચાલીને બેંક પહોંચ્યો.
-
બેંકની બહાર કંકાલ મૂકીને તે ધરણા પર બેસી ગયો અને તાત્કાલિક પૈસા આપવાની જીદ કરવા લાગ્યો.
પોલીસ અને તંત્રની કાર્યવાહી
આ દ્રશ્ય જોઈને બેંક કર્મચારીઓ અને સ્થાનિક લોકોમાં ફફડાટ ફેલાઈ ગયો હતો. ઘટનાની જાણ થતા જ પોલીસ કાફલો સ્થળ પર દોડી આવ્યો હતો. પોલીસે જિતુ મુંડાને સમજાવ્યો અને પરિસ્થિતિ શાંત પાડી હતી. ત્યારબાદ પ્રશાસન દ્વારા કાયદેસરની પ્રક્રિયા પૂર્ણ કરી કંકાલને ફરીથી સન્માનપૂર્વક દફનાવવાની વ્યવસ્થા કરવામાં આવી હતી.
