પશ્ચિમ રેલવે દ્વારા મુસાફરોનો કિંમતી સમય બચાવવા અને લાંબા અંતરની મુસાફરી વધુ ઝડપી બનાવવા માટે મોટો નિર્ણય લેવામાં આવ્યો છે. પશ્ચિમ રેલવે મંડળ હેઠળ દોડતી ગુજરાતની 21 સહિત કુલ 23 લોકપ્રિય સુપરફાસ્ટ અને મેલ એક્સપ્રેસ ટ્રેનોની મહત્તમ સ્પીડ 110 કિમી પ્રતિ કલાકથી વધારીને 130 કિમી પ્રતિ કલાક કરવાની મંજૂરી આપવામાં આવી છે. જનરલ મેનેજરની મંજૂરી મળતાં જ આ ટ્રેનોની ગતિ વધારવા માટેની કામગીરી શરૂ કરી દેવામાં આવી છે.
આ નિર્ણયથી ગુજરાત ઉપરાંત મહારાષ્ટ્ર, રાજસ્થાન, મધ્યપ્રદેશ અને ઉત્તર ભારત તરફ મુસાફરી કરતા લાખો યાત્રીઓને સીધો ફાયદો થશે. આ ઉપરાંત ટ્રેન નં. 19421/22 અમદાવાદ-પટણા એક્સપ્રેસમાં 22 LHB કોચ જોડીને તેને પણ 130 કિમીની ઝડપે દોડાવવામાં આવશે.
મુખ્ય મુદ્દા (Highlights):
-
પશ્ચિમ રેલવેની 23 ટ્રેનોની મહત્તમ ગતિ 110 કિમી/કલાકથી વધારી 130 કિમી/કલાક કરાઈ.
-
22 એલએચબી કોચ અને એન્જિન ધરાવતી ટ્રેનો માટે ઓછામાં ઓછું 551 મીટર લાંબું પ્લેટફોર્મ અનિવાર્ય રહેશે.
-
દિવ્યાંગ મુસાફરોની સુવિધા માટે વિશેષ LSLRD કોચ ઉપલબ્ધ કરાવાશે.
-
હેડ-ઓન-જનરેશન (HOG) સિસ્ટમના યોગ્ય સંચાલન માટે એન્જિન અને રેક વચ્ચે સંકલન જાળવવા સૂચના.
130 કિમી પ્રતિ કલાકની ઝડપે દોડનારી 23 ટ્રેનોની યાદી:
| ટ્રેન નંબર | ટ્રેનનું નામ / રૂટ |
| 12927-28 | દાદર – એકતાનગર સુપરફાસ્ટ |
| 12971-72 | બાંદ્રા – ભાવનગર એક્સપ્રેસ |
| 19255-56 | સુરત – મહુવા સુપરફાસ્ટ |
| 22945-46 | મુંબઈ – ઓખા સૌરાષ્ટ્ર મેઇલ |
| 12959-60 | બાંદ્રા – ભુજ સુપરફાસ્ટ |
| 12965-66 | બાંદ્રા – ભુજ સાપ્તાહિક |
| 19259-60 | કોચુવેલી – ભાવનગર એક્સપ્રેસ |
| 20483-84 | ભગત કી કોઠી – દાદર સુપરફાસ્ટ |
| 14707-08 | રણકપુર એક્સપ્રેસ |
| 14701-02 | અમરાપુર અરવલ્લી એક્સપ્રેસ |
| 20909-10 | કોચુવેલી – પોરબંદર સુપરફાસ્ટ |
| 12987-98 | બાંદ્રા – બાડમેર હમસફર એક્સપ્રેસ |
| 22901-02 | બાંદ્રા – ઉદયપુર સુપરફાસ્ટ |
| 22955-56 | બાંદ્રા – ભુજ કચ્છ સુપરફાસ્ટ |
| 22195-96 | ઝાંસી – બાંદ્રા સુપરફાસ્ટ |
| 16337-38 | ઓખા – એર્નાકુલમ એક્સપ્રેસ |
| 16613-14 | રાજકોટ – કોઈમ્બતૂર એક્સપ્રેસ |
| 19203-04 | બાંદ્રા – વેરાવળ સાપ્તાહિક |
| 19711-12 | જયપુર – ભોપાલ એક્સપ્રેસ |
| 20957-58 | ઈન્દોર – હિસાર સુપરફાસ્ટ |
| 22963-64 | બાંદ્રા – ભાવનગર સાપ્તાહિક |
| 20951-52 | ઓખા – જયપુર સાપ્તાહિક |
| 19309-10 | શાંતિ એક્સપ્રેસ |
સુરક્ષા અને ટેકનિકલ માર્ગદર્શિકા
હાઈ-સ્પીડ ટ્રેન સંચાલન દરમિયાન મુસાફરોની સુરક્ષા માટે રેલવે તંત્ર દ્વારા વિશેષ સાવચેતી રાખવામાં આવી રહી છે. તમામ ટ્રેનોમાં આધુનિક LHB કોચ, યોગ્ય બ્રેકિંગ સિસ્ટમ અને પ્લેટફોર્મ લંબાઈના માપદંડો પૂર્ણ કર્યા બાદ જ આ ગતિ વધારો અમલમાં મૂકવામાં આવશે.
