પાકિસ્તાન ક્રિકેટ બોર્ડ (PCB) એ એક મોટો અને ચોંકાવનારો નિર્ણય લીધો છે. પીસીબીએ ખેલાડીઓના સેન્ટ્રલ કોન્ટ્રાક્ટમાંથી જૂની ગ્રેડ સિસ્ટમ સંપૂર્ણપણે નાબૂદ કરી દીધી છે. હવે પાકિસ્તાની ક્રિકેટરોને A, B, C કે D ગ્રેડના આધારે કોન્ટ્રાક્ટ નહીં મળે. તેના બદલે, ખેલાડી કયા ફોર્મેટમાં રમે છે તેના આધારે તેની સેલરી નક્કી થશે.
પીસીબીના આ નવા નિયમને ‘ફોર્મેટ ટ્રેક્સ’ (Format Tracks) નામ આપવામાં આવ્યું છે. પીસીબી પ્રમુખ મોહસિન નકવી, કોચ આકિબ જાવેદ અને માઈક હેસને એક પ્રેસ કોન્ફરન્સમાં આ નવી સિસ્ટમની જાહેરાત કરી હતી.
ટેસ્ટ ક્રિકેટ રમતા ખેલાડીઓને મળશે સૌથી વધુ મહત્વ
PCB ની આ નવી સિસ્ટમને ચાર અલગ-અલગ ટ્રેકમાં વહેંચવામાં આવી છે:
-
ટ્રેક A (Track A): આમાં માત્ર એવા ખેલાડીઓ હશે જે ટેસ્ટ ક્રિકેટના સ્પેશિયાલિસ્ટ છે.
-
ટ્રેક B અને C (Track B & C): આ બંને ટ્રેક વનડે (ODI) અને ટી-20 (T20) ફોર્મેટના નિષ્ણાતો માટે છે.
-
ટ્રેક D (Track D): આ ટ્રેકમાં માત્ર ટી-20 અને દુનિયાભરની ફ્રેન્ચાઈઝી લીગ રમતા ખેલાડીઓનો સમાવેશ થશે.
નવી નીતિ મુજબ, PCB ટેસ્ટ રમતા ખેલાડીઓને સૌથી વધુ મહત્વ આપશે. આ ખેલાડીઓને વિદેશી લીગમાં રમવાની તકો ખૂબ જ ઓછી મળશે.
પક્ષપાત ખતમ કરવા મોહસિન નકવીનો માસ્ટર પ્લાન
પીસીબીના અધ્યક્ષ મોહસિન નકવીએ જણાવ્યું કે, પહેલા ખેલાડીઓની કેટેગરીને લઈને હંમેશા વિવાદ થતો હતો. ઘણા ખેલાડીઓ પોતાની કેટેગરીથી નારાજ રહેતા હતા. આ પક્ષપાતને ખતમ કરવા માટે જ નવો નિયમ લાવવામાં આવ્યો છે.
હવે કોન્ટ્રાક્ટ આપવાના 85% નિર્ણયો કોઈ વ્યક્તિની પસંદ-નાપસંદના આધારે નહીં થાય. તે સંપૂર્ણપણે કોમ્પ્યુટરના આંકડા અને ખેલાડીઓના પ્રદર્શનને જોઈને લેવામાં આવશે.
હવે કોમ્પ્યુટર ડેટાના આધારે થશે ટીમ સિલેક્શન
પાકિસ્તાની ટીમની પસંદગી પ્રક્રિયામાં પણ મોટો ફેરફાર કરાયો છે. હવે ટીમમાં ખેલાડીઓનું સિલેક્શન કોઈની ભલામણ પર નહીં થાય.
-
ટીમ પસંદગીમાં 85% નિર્ણય કોમ્પ્યુટર ડેટા અને રેકોર્ડ્સ પર આધારિત રહેશે.
-
સિલેક્ટર્સની પસંદગીની ભૂમિકા માત્ર 15% જ રહેશે.
PCB નું માનવું છે કે આ ડિજિટલ પદ્ધતિથી પક્ષપાત સંપૂર્ણપણે નાબૂદ થશે. તેનાથી માત્ર સાચા અને ટેલેન્ટેડ ખેલાડીઓને જ આગળ વધવાની તક મળશે.
