નાગાલેન્ડમાંથી એક મોટા અને દુખદ સમાચાર સામે આવ્યા છે. નાગાલેન્ડના સુખોવી નજીક સુરક્ષા દળોને નિશાન બનાવીને એક કાયરતાપૂર્ણ હુમલો કરવામાં આવ્યો છે. અહીં આસામ રાઇફલ્સના વાહનને નિશાન બનાવીને શંકાસ્પદ IED બ્લાસ્ટ કરાયો છે. આ ભયાનક વિસ્ફોટમાં 1 જવાન શહીદ થયા છે, જ્યારે અન્ય 4 જવાનો ગંભીર રીતે ઘાયલ થયા છે.
ચુમૌકેદિમા વિસ્તારમાં બની ઘટના
આ હુમલો નાગાલેન્ડના ચુમૌકેદિમા વિસ્તારમાં સુખોવી ક્ષેત્ર પાસે થયો હતો. આસામ રાઇફલ્સનું વાહન જ્યારે ત્યાંથી પસાર થઈ રહ્યું હતું, ત્યારે જ શંકાસ્પદ ઇમ્પ્રુવાઇઝ્ડ એક્સપ્લોઝિવ ડિવાઇસ (IED) ધડાકો થયો હતો.
ધડાકો એટલો તીવ્ર હતો કે વાહનને મોટું નુકસાન થયું છે. ઘટનાની જાણ થતાં જ સેના અને સ્થાનિક પોલીસ સક્રિય થઈ ગઈ છે.
ઘાયલ જવાનો હોસ્પિટલમાં દાખલ, સર્ચ ઓપરેશન શરૂ
-
તાત્કાલિક સારવાર: શરૂઆતી માહિતી મુજબ, બ્લાસ્ટમાં ઘાયલ થયેલા ચારેય જવાનોને તાત્કાલિક નજીકની સૈન્ય હોસ્પિટલમાં ખસેડાયા છે. હાલ ત્યાં તેમની સારવાર ચાલી રહી છે.
-
સમગ્ર વિસ્તારની ઘેરાબંધી: ઘટના બાદ સુરક્ષા દળોએ તરત જ સમગ્ર વિસ્તારને ઘેરી લીધો છે.
-
જંગલોમાં સર્ચ ઓપરેશન: શંકાસ્પદ હુમલાખોરોને પકડવા માટે સુખોવી અને તેની આસપાસના જંગલોમાં સેના દ્વારા મોટું સંયુક્ત સર્ચ ઓપરેશન શરૂ કરવામાં આવ્યું છે.
એક જ અઠવાડિયામાં આ બીજો વિસ્ફોટ
નાગાલેન્ડમાં સુરક્ષા વ્યવસ્થાને લઈને ચિંતા વધી છે, કારણ કે એક જ અઠવાડિયાની અંદર આ આ બીજી એવી ઘટના છે. આ અગાઉ પણ આસામ રાઇફલ્સના કાફલા પાસે IED વિસ્ફોટ થયો હતો.
વિસ્તારમાં હાઈ એલર્ટ: આ સતત બીજા હુમલા બાદ સમગ્ર વિસ્તારમાં હાઈ એલર્ટ જાહેર કરી દેવાયું છે અને સુરક્ષા વ્યવસ્થા સખત કરી દેવામાં આવી છે. આ હુમલા પાછળ કયા ઉગ્રવાદી સંગઠનનો હાથ છે, તેની સત્તાવાર પુષ્ટિ હજુ સુધી થઈ શકી નથી.
