વૈશ્વિક બજાર તરફથી એવિયેશન સેક્ટર (Aviation Sector) માટે એક મોટા અને રાહતના સમાચાર સામે આવ્યા છે. ઇન્ટરનેશનલ ફ્લાઇટ્સ માટે ઉપયોગમાં લેવાતા એવિયેશન ટર્બાઇન ફ્યુઅલ (ATF) એટલે કે જેટ ફ્યુઅલની કિંમતોમાં ભારે 27 ટકાનો ઘટાડો કરવામાં આવ્યો છે.
જો કે, દેશની અંદર ઉડાન ભરતી ઘરેલુ (ડોમેસ્ટિક) ફ્લાઇટ્સ માટે જેટ ફ્યુઅલની કિંમતોમાં કોઈ જ ફેરફાર કરવામાં આવ્યો નથી. તેના ભાવ જૂના દરે જ યથાવત્ રાખવામાં આવ્યા છે.
-
આંતરરાષ્ટ્રીય ફ્લાઇટ્સ માટે જેટ ફ્યુઅલના ભાવમાં 27% નો મોટો ઘટાડો થયો છે.
-
જેટ ફ્યુઅલની કિંમતમાં પ્રતિ કિલોલિટર 400 અમેરિકન ડૉલરથી વધુનો ઘટાડો નોંધાયો છે.
-
નવી કિંમત ઘટીને હવે આશરે 1,100 અમેરિકન ડૉલર પ્રતિ કિલોલિટર થઈ ગઈ છે.
-
ડોમેસ્ટિક (ઘરેલુ) ફ્લાઇટ્સના ઇંધણના ભાવમાં કોઈ ફેરફાર કરાયો નથી.
ઇન્ટરનેશનલ ફ્લાઇટ્સ માટે કિંમતોમાં મોટો ઘટાડો
ઉદ્યોગના સૂત્રો પાસેથી મળતી માહિતી અનુસાર, આ મોટા ઘટાડાને કારણે ઇન્ટરનેશનલ ફ્લાઇટ્સ માટે જેટ ફ્યુઅલની કિંમતોમાં પ્રતિ કિલોલિટર 400 અમેરિકન ડૉલરથી પણ વધુનો ઘટાડો નોંધાયો છે. આ ઘટાડા બાદ હવે નવી કિંમત ઘટીને આશરે 1,100 અમેરિકન ડૉલર પ્રતિ કિલોલિટર થઈ ગઈ છે, જે ભારતીય ચલણમાં આશરે 1,05,000 રૂપિયા પ્રતિ કિલોલિટર જેટલી થાય છે.
અગાઉ વૈશ્વિક બજારમાં તેજીના કારણે 1 મેના રોજ આ કિંમતો 76.55 ડૉલર (5.33 ટકા) વધીને 1,511.86 ડૉલર પ્રતિ કિલોલિટર પર પહોંચી ગઈ હતી. જ્યારે તે પહેલા એપ્રિલ મહિનામાં પશ્ચિમ એશિયાના યુદ્ધ અને આંતરરાષ્ટ્રીય ઊર્જા સંકટને કારણે કિંમતો બમણાથી પણ વધુ વધીને 1,435.31 ડૉલર થઈ ગઈ હતી. હવે કિંમતો નરમ પડતાં તેનો સીધો લાભ વિદેશી ફ્લાઇટ્સને આપવામાં આવ્યો છે.
ઘરેલુ ફ્લાઇટ્સના ભાડામાં કોઈ ફેરફાર નહીં
બીજી તરફ, ડોમેસ્ટિક ફ્લાઇટ્સ માટે ATFના ભાવ સ્થિર રાખવામાં આવ્યા છે. એરલાઇન કંપનીઓએ ઘરેલુ સપ્લાય માટે હજુ પણ 1,04,927.18 રૂપિયા પ્રતિ કિલોલિટર ચૂકવવાનું ચાલુ રાખવું પડશે. આ દર 1 એપ્રિલથી લાગુ કરાયો હતો.
વાસ્તવમાં, મે મહિનામાં આંતરરાષ્ટ્રીય સ્તરે ભાવ વધ્યા હોવા છતાં સરકારી ફ્યુઅલ રિટેલ કંપનીઓએ મુસાફરો પર મોંઘવારીનો બોજ ન પડે તે માટે કિંમતો વધારી ન હતી અને નુકસાન પોતે સહન કર્યું હતું. ઘરેલુ સપ્લાય પર કંપનીઓ હજુ પણ નુકસાન ઉઠાવી રહી હોવાથી ડોમેસ્ટિક ટિકિટના ભાવમાં ફેરફાર થવાની શક્યતા નહિવત છે.
સરકાર અને કંપનીઓનું સંતુલિત પગલું
ભારતમાં જેટ ફ્યુઅલની કિંમતોને બે દાયકા પહેલાં જ નિયંત્રણ-મુક્ત (ડિરેગ્યુલેટેડ) કરી દેવામાં આવી હતી, જેથી એરલાઇન્સ સાથેના કરાર મુજબ કિંમતો આંતરરાષ્ટ્રીય માર્કેટના હિસાબે નક્કી થાય છે. પરંતુ હાલમાં પશ્ચિમ એશિયામાં ચાલી રહેલા તણાવ અને યુદ્ધના કારણે વૈશ્વિક એનર્જી માર્કેટમાં અભૂતપૂર્વ ઉછાળો આવ્યો હતો.
આવી સ્થિતિમાં ATFની કિંમતોમાં અત્યાર સુધીનો સૌથી મોટો વધારો ઝીંકવાની જરૂર હતી, પરંતુ સરકારે અને સરકારી ક્રૂડ કંપનીઓએ ખૂબ જ સંતુલિત અને ગંભીરતાપૂર્વક પગલું ભર્યું. તેમણે આંતરરાષ્ટ્રીય ફ્લાઇટ્સ માટે માર્કેટ લિંક્ડ રેટ રાખ્યા, પરંતુ દેશના સામાન્ય નાગરિકોને અસર ન થાય તે માટે ઘરેલુ ફ્લાઇટ્સની કિંમતોને નિયંત્રણમાં રાખીને મોટી રાહત આપી છે.
છેલ્લા ૩ મહિનાના નિર્ણયો પર એક નજર
-
1 એપ્રિલનો નિર્ણય: સરકારે જાહેરાત કરી હતી કે ઓઇલ માર્કેટિંગ કંપનીઓ (OMCs) શેડ્યૂલ ઘરેલુ ફ્લાઇટ્સ માટે માત્ર 25% અથવા 15,000 રૂપિયા પ્રતિ કિલોલિટરનો આંશિક વધારો વસૂલશે. આના કારણે દિલ્હી એરપોર્ટ પર કિંમત 1,04,927 રૂપિયા પ્રતિ કિલોલિટર થઈ હતી. જો કે, નોન-શેડ્યૂલ અને પ્રાઇવેટ જેટ ફ્લાઇટ્સ માટે પૂરેપૂરો 73,000 રૂપિયાનો વધારો લાગુ કરાયો હતો.
-
મે મહિનાની સ્થિતિ: મે મહિનામાં ઘરેલુ ફ્લાઇટ્સ માટે ભાવ યથાવત્ રહ્યા, જ્યારે ઇન્ટરneશનલ ફ્લાઇટ્સ માટે ભાવ વધીને 1,511.86 ડૉલર પ્રતિ કિલોલિટર થયા હતા.
-
જૂન મહિનાની સ્થિતિ: ચાલુ જૂન મહિના માટે પણ ઘરેલુ ફ્લાઇટ્સના ભાવમાં રાહત યથાવત્ છે, જ્યારે ઇન્ટરનેશનલ ફ્લાઇટ્સને 400 ડૉલરના ઘટાડા સાથે આશરે 1,100 ડૉલર પ્રતિ કિલોલિટરનો મોટો ફાયદો મળ્યો છે.
< /p>
