મિડલ ઈસ્ટ (Middle-East) માં ચાલી રહેલો તણાવ હવે અત્યંત ખતરનાક સ્તરે પહોંચી ગયો છે. ઈરાને કુવૈત પર મોટો મિસાઈલ અને ડ્રોન હુમલો કર્યો છે. આ હુમલામાં કમનસીબે 1 ભારતીય નાગરિકે પોતાનો જીવ ગુમાવ્યો છે. કુવૈત સ્થિત ભારતીય દૂતાવાસે આ દુઃખદ સમાચારની સત્તાવાર પુષ્ટિ કરી દીધી છે. ઈરાનનો મુખ્ય ટાર્ગેટ કુવૈત એરપોર્ટ હતું. આ હુમલા બાદ ખાડી દેશોની સુરક્ષાને લઈને સમગ્ર વિશ્વમાં ચિંતા ફેલાઈ ગઈ છે.
કેમ તૂટ્યું સીઝફાયર? કેવી રીતે શરૂ થયો હુમલો
અમેરિકા અને ઈરાન વચ્ચે અગાઉ થયેલું સીઝફાયર બરાબર 56 દિવસ બાદ તૂટી ગયું છે. બંને દેશો વચ્ચે ફરીથી યુદ્ધ શરૂ થઈ ગયું છે.
-
અમેરિકી હુમલાનો બદલો: ઈરાનનો દાવો છે કે અમેરિકી નૌસેનાએ ખાર્ગ આઈલેન્ડ (Kharg Island) પાસે ઈરાની સેના IRGC ના કમાન્ડ સેન્ટર પર હુમલો કર્યો હતો.
-
બેક ટુ બેક મિસાઈલ પ્રહાર: આ હુમલાના જવાબમાં ઈરાને કુવૈત અને બહેરીનમાં આવેલા અમેરિકી સૈન્ય અડ્ડાઓ પર બેલિસ્ટિક મિસાઈલો અને ડ્રોન વડે ભીષણ હુમલો કરી દીધો.
-
હવામાં જ મિસાઈલો તોડી પાડી: અમેરિકી સેન્ટ્રલ કમાન્ડ (CENTCOM) નો દાવો છે કે તેમણે ઈરાનની મોટાભાગની મિસાઈલોને હવામાં જ ઈન્ટરસેપ્ટ કરીને નષ્ટ કરી દીધી હતી.
ઈરાન નમવા તૈયાર નથી
ઈરાનના વોરટાઈમ હેડક્વાર્ટર ‘ખતમ-અલ-અનબિયા કમાન્ડ’ દ્વારા કડક વલણ અપનાવવામાં આવ્યું છે. તેમણે સ્પષ્ટ ચેતવણી આપી છે કે જ્યાં સુધી અમેરિકા અને ઈઝરાયેલ પોતાની ભૂલો માટે માફી નહીં માંગે, ત્યાં સુધી આ મિસાઈલ હુમલા ચાલુ જ રહેશે. આ પહેલા 28 ફેબ્રુઆરીથી 8 એપ્રિલ સુધી બંને પક્ષો વચ્ચે ભયંકર યુદ્ધ થયું હતું.
ડોનાલ્ડ ટ્રમ્પના દાવા અને વાસ્તવિકતા
બીજી તરફ અમેરિકાના રાષ્ટ્રપતિ ડોનાલ્ડ ટ્રમ્પ અને મીડિયાના અહેવાલો વચ્ચે પરસ્પર વિરોધાભાસ જોવા મળી રહ્યો છે:
-
મીડિયાનો દાવો: ઈરાની અને અમેરિકી મીડિયાનું કહેવું છે કે ટ્રમ્પના શાંતિ વાર્તાના દાવા પોકળ છે. છેલ્લા ઘણા દિવસોથી બંને દેશો વચ્ચે કોઈ સંપર્ક થયો નથી. પાકિસ્તાનમાં થયેલી શાંતિ વાર્તા પણ નિષ્ફળ રહી છે.
-
ટ્રમ્પનો પલટવાર: ડોનાલ્ડ ટ્રમ્પે આ અહેવાલોને ફેક ન્યૂઝ ગણાવ્યા છે. ટ્રમ્પે સોશિયલ મીડિયા પર દાવો કર્યો છે કે, “અમારી રોજ ઈરાન સાથે વાત થાય છે. મેં ઈરાનને સ્પષ્ટ કહી દીધું છે કે જે તે છેલ્લા 47 વર્ષથી કરી રહ્યો છે, તે આ વખતે ચલાવી લેવામાં નહીં આવે.”
હાલમાં કુવૈત એરપોર્ટ પર થયેલા આ હુમલા બાદ ત્યાં રહેતા ભારતીય સમુદાયના લોકોમાં ભયનો માહોલ છે અને ભારતીય વિદેશ મંત્રાલય સ્થિતિ પર નજીકથી નજર રાખી રહ્યું છે.
< /p>
