પાટણ: ગુજરાતમાં કાયદો અને વ્યવસ્થાની સ્થિતિ સામે સવાલો ઉભા કરતો એક કિસ્સો પાટણ જિલ્લાના ચાણસ્મા તાલુકાના ઝીલીયા ગામે સામે આવ્યો છે. અહીં હથિયારધારી શખ્સોના હુમલા વખતે સ્થળ પર હાજર હોવા છતાં ભાગી છૂટનાર પોલીસ કર્મીઓ સામે ઉચ્ચ અધિકારીઓએ લાલ આંખ કરી છે. આ મામલે PI સોલંકી સહિત 8 પોલીસકર્મીઓને તાત્કાલિક અસરથી સસ્પેન્ડ કરી દેવામાં આવ્યા છે.
શું હતો સમગ્ર મામલો?
ચાણસ્માના ઝીલીયા ગામ પાસે ભાવેશભાઈ નામના વ્યક્તિનું ફાર્મ હાઉસ આવેલું છે.
-
આ ફાર્મ હાઉસ પર 20 જેટલા માથાભારે શખ્સોએ પ્રાણઘાતક હથિયારો સાથે હુમલો કર્યો હતો.
-
હુમલાખોરોએ તોડફોડ કરી ભયનું વાતાવરણ ઉભું કર્યું હતું.
-
સૌથી આઘાતજનક બાબત એ હતી કે પોલીસની ટીમ ત્યાં હાજર હતી, છતાં તેઓએ હુમલાખોરોને રોકવાના બદલે જીવ બચાવીને ભાગવાનું મુનાસિબ માન્યું હતું.
પોલીસની લાચારી કે જવાબદારીમાં બેદરકારી?
પાટણ જિલ્લામાં છેલ્લા એક અઠવાડિયામાં બે મર્ડરની ઘટનાઓ બની છે. આવી સ્થિતિમાં પોલીસ લુખ્ખાતત્વોના ડરથી ભાગી છૂટે તે બાબતે સોશિયલ મીડિયા અને લોકમુખે ભારે ટીકાઓ થઈ રહી છે. લોકો સવાલ ઉઠાવી રહ્યા છે કે જો રક્ષકો જ ભક્ષકોથી ડરવા લાગે તો સામાન્ય જનતાની સુરક્ષા કોણ કરશે?
સસ્પેન્ડ થયેલા પોલીસકર્મીઓની યાદી
આ ઘટનાની ગંભીરતાને જોતા ઉચ્ચ પોલીસ અધિકારીઓએ કડક કાર્યવાહીના આદેશ આપ્યા છે. સસ્પેન્ડ કરાયેલા 8 જવાનોમાં નીચેનાનો સમાવેશ થાય છે:
-
PI સોલંકી (પોલીસ ઇન્સ્પેક્ટર)
-
ASI (આસિસ્ટન્ટ સબ ઇન્સ્પેક્ટર)
-
હેડ કોન્સ્ટેબલ
-
5 GRD જવાનો (ગ્રામ રક્ષક દળ)
પોલીસ બેડામાં ખળભળાટ
એકસાથે PI સહિત 8 જવાનોને સસ્પેન્ડ કરવાના આદેશ છૂટતા પાટણ પોલીસ તંત્રમાં ફફડાટ વ્યાપી ગયો છે. આ કાર્યવાહી દ્વારા ઉચ્ચ અધિકારીઓએ સ્પષ્ટ સંદેશ આપ્યો છે કે ફરજમાં બેદરકારી કે કાયરતા સાંખી લેવામાં આવશે નહીં. આ ઘટના બાદ હવે ઝીલીયા પંથકમાં પોલીસ પેટ્રોલિંગ વધારવામાં આવ્યું છે અને હુમલાખોરોની શોધખોળ તેજ કરવામાં આવી છે.
