બોલિવૂડ એક્ટ્રેસ જેકલીન ફર્નાન્ડીઝ (Jacqueline Fernandez) ની મુશ્કેલીઓમાં ફરી એકવાર મોટો વધારો થયો છે. મહાઠગ સુકેશ ચંદ્રશેખર સાથે જોડાયેલા 200 કરોડ રૂપિયાના મની લોન્ડ્રિંગ કેસ માં એક નવું અપડેટ સામે આવ્યું છે. દિલ્હીની પટિયાલા હાઉસ કોર્ટે આ મામલે જેકલીન અને અન્ય આરોપીઓ સામે આરોપો (Charges) નક્કી કરવાનો આદેશ આપ્યો છે.
કોર્ટે મની લોન્ડ્રિંગ કેસની સાથે મકોકા (MCOCA) હેઠળ પણ સુકેશ ચંદ્રશેખર અને લીના મારિયા પોલ જેવા આરોપીઓ સામે ચાર્જ ફ્રેમ કરવાનો નિર્દેશ આપ્યો છે. આ સાથે જ કોર્ટે જેકલીન સહિત તમામ આરોપીઓને આગામી 3 જૂને કોર્ટમાં હાજર રહેવા જણાવ્યું છે.
શું છે આખો મામલો?
આ કેસ દિલ્હી પોલીસમાં નોંધાયેલી એક FIR સાથે જોડાયેલો છે. આ ફરિયાદ અદિતિ સિંહ નામની મહિલાએ નોંધાવી હતી. તપાસ એજન્સીઓના જણાવ્યા મુજબ, સુકેશ ચંદ્રશેખરે જેલની અંદરથી જ કરોડો રૂપિયાની ખંડણી વસૂલી હતી.
એન્ફોર્સમેન્ટ ડિરેક્ટોરેટ (ED) નો આરોપ છે કે જેકલીન ફર્નાન્ડીઝને સુકેશ તરફથી મોંઘી ભેટો અને અન્ય આર્થિક લાભ મળ્યા હતા. જોકે, જેકલીન સતત એવું કહી રહી છે કે તેને આ પૈસાના ખોટા સોર્સ વિશે કોઈ જાણકારી નહોતી.
જેકલીનની કરિયર પર પડી ઊંડી અસર
સુકેશ ચંદ્રશેખર ભલે જેલમાં હોય, પરંતુ તેની લક્ઝરી લાઈફની વાર્તાઓ અવારનવાર સોશિયલ મીડિયા પર વાયરલ થાય છે. જેકલીન ભૂતકાળમાં સુકેશને મળવા જેલમાં પણ ગઈ હતી. ત્યારબાદ બંનેની કથિત પ્રેમ કહાની હેડલાઈન્સમાં આવી હતી.
રિપોર્ટ્સ મુજબ, સુકેશે જેકલીન અને તેના પરિવારને વિદેશમાં મોંઘી ગિફ્ટ આપી હતી. આ ગિફ્ટના પૈસા ગેરકાયદેસર રીતે કમાવવામાં આવ્યા હતા. આ વિવાદના કારણે જેકલીનની બ્રાન્ડ ઈમેજ અને ફિલ્મી કરિયર પર ખૂબ જ ખરાબ અસર પડી છે. હવે જોવાનું એ રહેશે કે 3 જૂને કોર્ટમાં હાજર થયા બાદ જેકલીનની મુશ્કેલીઓ કેટલી વધે છે.
