દિલ્હીની રાઉસ એવેન્યુ કોર્ટે એક મોટો ચુકાદો આપ્યો છે. કોર્ટે બિહારના સાહિબગંજથી ભાજપ (BJP) ધારાસભ્ય રાજુ કુમાર સિંહને ગેરકાનૂની માનવવધના મામલામાં 4 વર્ષની જેલની સજા સંભળાવી છે. આ સાથે જ કોર્ટે ધારાસભ્ય પર 25 લાખ રૂપિયાનો દંડ પણ ફટકાર્યો છે. આ દંડની રકમ મૃતક મહિલાના પતિને વળતર તરીકે આપવાનો આદેશ કરાયો છે.
ન્યૂ યર પાર્ટીમાં થઈ હતી ભયાનક ઘટના
આ સમગ્ર મામલો 31 ડિસેમ્બર 2018ની રાતનો છે. સાઉથ દિલ્હીના ફતેહપુર બેરી સ્થિત એક ફાર્મહાઉસમાં નવા વર્ષની (New Year Eve) પાર્ટી ચાલી રહી હતી. આ પાર્ટી ધારાસભ્ય રાજુ સિંહના ભાઈ દ્વારા આયોજિત કરવામાં આવી હતી.
જશ્ન દરમિયાન ધારાસભ્ય રાજુ સિંહે હવામાં ગોળીબાર (Harsh Firing) કર્યો હતો. આ ગોળી ત્યાં હાજર ડૉ. અર્ચના ગુપ્તા નામની મહિલાને વાગી હતી, જેના કારણે તેમનું મોત નીપજ્યું હતું. મૃતક મહિલા ધારાસભ્યના ભાઈના મિત્રની પત્ની હતી.
આર્મ્સ એક્ટ હેઠળ પણ થઈ સજા
કોર્ટે આ મામલાની સુનાવણી દરમિયાન ભાજપ ધારાસભ્યને ગેર-ઇરાદાપૂર્વક હત્યા (જે હત્યાની શ્રેણીમાં નથી આવતી) માટે દોષિત જાહેર કર્યા હતા.
આ ઉપરાંત, કોર્ટે તેમને આર્મ્સ એક્ટ હેઠળ પણ 2 મહિનાની જેલની સજા ફટકારી છે. જો ધારાસભ્ય દ્વારા વળતરની 25 લાખની રકમ ચૂકવવામાં નહીં આવે, તો તેમણે વધુ 3 મહિનાની અતિરિક્ત જેલની સજા ભોગવવી પડશે.
ધારાસભ્યએ કોર્ટમાં કરી હતી નરમ સજાની અપીલ
સુનાવણી દરમિયાન ધારાસભ્ય રાજુ સિંહના વકીલે કોર્ટને જણાવ્યું હતું કે તેઓ 6 વખત ધારાસભ્ય રહી ચૂક્યા છે અને તેમનો ભૂતકાળનો રેકોર્ડ સારો રહ્યો છે. તેમના ઘરમાં વૃદ્ધ માતા-પિતા છે, તેથી તેમને પ્રોબેશન પર મુક્ત કરવામાં આવે અથવા 2 વર્ષથી ઓછી સજા આપવામાં આવે.
રાજુ સિંહે પોતે પણ કોર્ટ સામે હાથ જોડીને કહ્યું, “મેં ક્યારેય કોઈ ખોટું કામ કર્યું નથી. હું એક સામાજિક વ્યક્તિ છું. મૃતક મહિલા મારા ભાઈના મિત્રની પત્ની હતી અને હું તેમને ભાભી કહેતો હતો. આ એક અકસ્માત હતો, તેથી મને ઓછામાં ઓછી સજા કરવામાં આવે.” જોકે, કોર્ટે ગુનાની ગંભીરતાને જોતા તેમને 4 વર્ષની જેલની સજા સંભળાવી છે.
